ՀՀԿ երիտասարդական կազմակերպության տարածած հաղորդագրության համաձայն` մարտի 3-6-ը Հունգարիայի մայրաքաղաք Բուդապեշտում Եվրոպայի ժողովուրդների կուսակցության (ԵժԿ) երիտասարդական կազմակերպության նախաձեռնությամբ անցկացվեց «Աշխատուժի շարժունություն» խորագրով եռօրյա խորհրդաժողովը: Ծրագրին Հայաստանի հանրապետական կուսակցության Երիտասարդական կազմակերպությունը ներկայացնում էր ՀՀԿ ԵԿ Արտաքին կապերի հանձնաժողովի նախագահ Լիլիթ Բեգլարյանը:
Խորհրդաժողովի նպատակն էր կազմել նախագիծ` աշխատանքի շուկայի մոդերնալիզացման նոր ուղիների ներառմամբ, որոնք կօգնեն երիտասարդ կադրերին հնարավորինս հեշտությամբ հաղթահարել աշխատանքի շուկա մուտք գործելու արգելքները, ինչպիսիք են` աշխատանքային փորձի պակասը կամ բացակայությունը, գիտելիքների և հմտությունների անհամապատասխանությունը աշխատանքի շուկայի պահանջներին և այլն:
Այս և այլ խնդիրների հաղթահարման նպատակով ծրագրի ընթացքում աշխատանքային խմբերով անցկացվեցին քննարկումներ, բանավեճեր, որոնք շոշափում էին թվային սերնդի ներկայացրած մարտահրավերները, երիտասարդ կադրերի և աշխատանքի շուկայի միջև եղած խզումները, և արդյունքում մշակվեց բանաձևերի շարք, որոնք քննարկման դրվեցին ծրագրի եզրափակիչ օրը տեղի ունեցած խորհրդաժողովի ընթացքում:
Բանաձևերում աշխատանքի թվայնացումից զատ անդրադարձ կատարվեց FIFA-ի բարեփոխումներին, միգրացիոն ճգնաժամերին, Մերձավոր Արևելքում փոքրամասնությունների բռնի հետապնդմանը, քաղաքացիական հասարակությանը և կայուն կենսաթոշակային համակարգի ստեղծմանը:
Խորհրդաժողովի ընթացքում բանաձևերի քննարկման արդյունքում կազմվեց Եվրոպայում աշխատուժի շարժունության վերաբերյալ նախագիծ, որտեղ ամփոփվեցին թվային սերնդի առջև ծառացած խնդիրների լուծման համար առաջարկված լավագույն ուղիները:
.gif)
