ՀՀ ԱԺ նախագահ Գալուստ Սահակյանը շնորհավորական ուղերձ է հղել տեղական ինքնակառավարման օրվա առթիվ: Ուղերձում մասնավորապես ասված է.
«Շնորհավորում եմ տեղական ինքնակառավարման մարմիններին եւ ՏԻՄ աշխատակիցներին տեղական ինքնակառավարման համակարգի ստեղծման 20-ամյակի առթիվ:
Այսօր` տեղական ինքնակառավարման մարմինների ստեղծումից երկու տասնամյակ անց, ՏԻՄ-երի աշխատանքը շարունակվում է ՀՀ Սահմանադրության վերջին փոփոխությունների համատեքստում, որը լիազորությունների մեծացման հետ մեկտեղ ենթադրում է նաեւ համայնքի կյանքը կազմակերպելու ավելի մեծ հնարավորություններ, ինչպես նաեւ համայնքի բնակիչների ավելի լայն եւ ակտիվ մասնակցություն տեղական ինքնակառավարման գործընթացներին: Յուրաքանչյուր ժամանակաշրջան առաջադրում է իր խնդիրները, որոնք ընդհանրություններ ունենալով հանդերձ` նաեւ առանձնահատուկ են, եւ որոնց լուծումը բխում է թե յուրաքանչյուր համայնքի ու նրա յուրաքանչյուր բնակչի, թե ողջ երկրի շահերից: Շատ կարեւոր է, որ տեղական ինքնակառավարման մարմինները իրենց կայացմանը զուգընթաց կարողացել են հնարավորինս լուծել այդ խնդիրները:
Առավելագույնս մոտ կանգնած լինելով համայնքի բնակչին` ՏԻՄ-երը յուրատեսակ ուժ են ոչ միայն համայնքային խնդիրների վերհանման, այլեւ դրանց լուծմանը հասնելու ճանապարհին: Տեղական ինքնակառավարման մարմինների ներկայացուցիչների աշխատանքից է մեծապես կախված մարդկանց կյանքի որակը համայնքներում, աշխատանք, որը պրոֆեսիոնալիզմից, կազմակերպչական ունակությունից բացի պահանջում է նաեւ զուտ մարդկային չափանիշներ` պատասխանատվությունից մինչեւ համբերատարություն ու պարկեշտություն:
ՀՀ Սահմանադրությունն ու նրանից բխող օրենսդրական դաշտը լայն իրավական հնարավորություն են ընձեռում համայնքային խնդիրների լուծման համար, իսկ տեղական ինքնակառավարման մարմիններն այդ խնդիրների անմիջական հասցեատերն ու պատասխանատուն են` իրենց գործունեությամբ մասնակցելով ողջ պետության վարկանիշի ձեւավորմանը, որովհետեւ տեղական ինքնակառավարման մարմնի աշխատանքի գնահատականի մեջ քաղաքացին ամփոփում է ողջ պետական համակարգի աշխատանքը: Երկրի ու քաղաքացու արժանապատիվ ապագայի համար անհրաժեշտ է համայնքների ու քաղաքացիների համատեղ ու համերաշխ աշխատանք` հիմնված փոխօգնության ու փոխվստահության վրա, որովհետեւ յուրաքանչյուր համայնք միասնական պետության կարեւորագույն օղակն է, իր ուժով հզորացնում է այն եւ ուժ ստանում նրանից:
Եւս մեկ անգամ շնորհավորելով տեղական ինքնակառավարման մարմիններին եւ ՏԻՄ աշխատակիցներին` մաղթում եմ հաջողություն, նպատակասլացություն, հաստատակամություն եւ շարունակական առաջընթաց»
.gif)
