Երևանի փոխքաղաքապետ Տիգրան Վիրաբյանն ու Երևանի գլխավոր ճարտարապետ Արթուր Մեսչյանն այցելել են Ավետիք Իսահակյանի անվան կենտրոնական գրադարան, ծանոթացել գրադարանի ընդլայնման առաջարկվող տարբերակներին ու դրանք քննարկել տեղում: Այս մասին հայտնում են Երևանի քաղաքապետարանի տեղեկատվության և հասարակայնության հետ կապերի վարչությունից։
Հաղորդագրության մեջ նաև նշված է. «Ավետիք Իսահակյանի անվան կենտրոնական գրադարանն ամեն օր մինչեւ 1500 այցելուի է սպասարկում: Նրանց մի մասը նախընտրում է ընթերցել և աշխատել հենց տեղում՝ ընդամենը 50 քմ տարածքով ընթերցասրահում:
Գրադարանի տարածքային խնդրին Երևանի քաղաքապետարանը քաջատեղյակ է: Այժմ քննարկվում են հնարավոր լուծումները: «Սա ընդլայնման հնարավորության առաջարկ է: Հիմնականում բաղկացած է լինելու երկու ընթերցասրահներից: Սրանք մի քիչ, այսպես ասած, ազատ կերպարի ընթերցասրահներ են: Ունենք նաև հարթակներ՝ քննարկումների համար»,- ներկայացրել է ճարտարապետ Էրիկ Հովհաննիսյանը:
«Ընդհանուր տարածքը, որն ունի գրադարանն իր ենթակայության ներքո, քիչ է: Մենք գլխավոր ճարտարապետի և գրադարանի տնօրինության հետ քննարկում ենք, որպեսզի կարողանանք գտնել տարածքային համալրումների համար տարբերակներ: Գրադարանը գտնվում է քաղաքի սրտում, և ցանկացած ճարտարապետական միջամտություն կարող է որոշակի խնդիրներ առաջացնել: Ուստի, դրանք պետք է լինեն ընդունելի բոլորի համար»,- ընդգծել է Տիգրան Վիրաբյանը:
Գրադարանին անհրաժեշտ են նոր ու բոլորի, այդ թվում՝ հաշմանդամություն ունեցող անձանց համար հարմարվետ պայմաններով ընթերցասրահներ: Թե ո՞ր հատվածից և ինչպե՞ս կընդլայնվի գրադարանի տարածքը, մասնագետները կորոշեն առաջիկայում:
«Ուզում եմ հույս հայտնել, որ անպայման կգտնվի որևէ լուծում, և Երևանի ընթերցողները սպասում են այդ լուծմանը»,- նշում է Հասմիկ Կարապետյանը:
Գրադարանի տարածքի ընդլայնման գաղափարը կյանքի կոչելու գործին մասնակցելու ցանկություն է հայտնել նաև Հայաստանում ԱՄՆ դեսպանատունը:
«Գիտեք, որ այսօր գրադարանում գործում է «Ամերիկյան անկյուն»: Իրենք պատրաստակամ են նաև տեխնիկական վերազինումն իրականացնել, ինչը ևս շատ կարևոր է»,- նշում է Տիգրան Վիրաբյանը:
Իսահակյանի անվան կենտրոնական գրադարանից մեկնարկող բարեփոխումների համընդհանուր ծրագիրը կշարունակվի Երևանի համայնքային մյուս գրադարաններում:
«Մենք փորձելու ենք համայնքային ենթակայությամբ գործող բոլոր գրադարանները բերել այսպիսի բարձր պրոֆեսիոնալ մակարդակի: Ցավում եմ, որ որոշ գրադարաններում ուեննք ընթերցողի պակաս, և այստեղ կառավարման աշխատանք պետք է տանենք, որ գրադարանները լինեն հետաքրքիր ընթերցողի համար»,- ընգդծել է Երևանի քաղաքապետի տեղակալը:
Երևանի քաղաքապետարանն առաջիկա տարիներին կշարունակի գրադարաններում ժամանակակից տեխնոլոգիաների կիրառման և ընթերցողներին գրադարան բերելու նախաձեռնությունները»:
.gif)
