Ինքնավնասում անելու մասին ահազանգ ստացած օպերլիազորին տան անդամները աթոռով հարվածել են և սպառնացել սպանել

ՀՀ քննչական կոմիտեի Լոռու մարզային քննչական վարչությունում հարուցվել է քրեական գործ՝ իշխանության ներկայացուցչի նկատմամբ բռնություն գործադրելու և զենք-ռազմամթերք հափշտակելու փորձի դեպքի առթիվ:

Այս մասին Armlur.am-ը տեղեկանում է քննչական կոմիտեի պաշտոնական կայքէջից:

Ըստ հաղորդագրության` ոստիկանության Լոռու մարզային քննչական վարչության Վանաձոր քաղաքի Բազումի բաժնի քրեական հետախուզության օպերլիազոր Ա.Ֆնդկյանը 2015 թվականի հուլիսի 31-ին զեկուցագիր է ներկայացրել առ այն, որ նույն օրը` ժամը 16:00-ի սահմաններում, Վ.Գրիգորյանի կողմից հարևանուհու` Ի.Կոստանյանի՝ Վանաձոր քաղաքի տանն ինքնավնասում կատարելու և անչափահաս երեխաներին սպառնալիքներ տալու վերաբերյալ ահազանգի հիման վրա մեկնել է դեպքի վայր:

Օպերլիազոր Ա. Ֆնդկյանն իր զեկուցագրում նշել է, որ այցելել է Վ.Գրիգորյանին պատկանող տուն և ներկայացել՝ ցույց տալով ծառայողական վկայականը, որից հետո վերջինիս մոր` Ն. Գրիգորյանի հրավերով մտել բնակարան: Տուն մտնելուց հետո Ն.Գրիգորյանը մետաղյա ձողով փակել է բնակարանի մուտքի դուռը, ապա Վ.Գրիգորյանի հետ հարձակվել նրա վրա, չեն ենթարկվել վիճաբանությունը դադարեցնելու՝ Ա.Ֆնդկյանի օրինական պահանջին և աթոռներով մի քանի հարվածներ են հասցրել նրա գլխին ու մարմնի տարբեր մասերին:

Բացի այդ, Վ.Գրիգորյանը դանակով սպառնացել է Ա.Ֆնդկյանին, փորձել նրանից խլել հաշվեցուցակային զենքը` սպառնալով դրանով սպանել նրան: Ն.Գրիգորյանի և Վ.Գրիգորյանի անօրինական գործողություններից պաշտպանվելու նպատակով Ա.Ֆնդկյանը մարտական վիճակի է բերել զենքը, նախազգուշացրել՝ շարունակելու դեպքում կրակելու մասին, և նախազգուշական կրակ արձակել նրանց հակառակ ուղղությամբ, սակայն Ն. և Վ.Գրիգորյաններն Ա.Ֆնդկյանին հրելով վայր են գցել հատակին և շարունակել հարվածներ հասցնել, իսկ Վ.Գրիգորյանը կրկին փորձել է խլել հաշվեցուցակային զենքը, որից հետո Ա.Ֆնդկյանը մեկ անգամ ևս նախազգուշական կրակ է արձակել: Սակայն Վ.Գրիգորյանը, բռնելով օպերլիազորի ձեռքերից, փորձել է զենքի փողն ուղղել նրա պարանոցի ուղղությամբ, որից հետո Ա.Ֆնդկյանը կրակել է Վ.Գրիգորյանի ոտքին՝ պատճառելով մարմնական վնասվածք:

Այդ ընթացքում դեպքի վայր է ժամանել նաև ոստիկանության օպերատիվ խումբը, փորձել ջարդել բնակարանի մուտքի դուռը, որից հետո Ն.Գրիգորյանը բացել է դուռը:

Նշված դեպքերի առթիվ 2015 թվականի հուլիսի 31-ին ՀՀ քննչական կոմիտեի Լոռու մարզային քննչական վարչությունում հարուցվել է քրեական գործ՝ ՀՀ քրեական օրենսգրքի 316-րդ հոդվածի 2-րդ մասով, 34-238-րդ հոդվածի 4-րդ մասի 2-րդ կետով: Լոռու մարզային քննչական վարչության պետի որոշմամբ՝ կազմվել է քննչական խումբ:

Ն. և Վ.Գրիգորյանները ձերբակալվել են:

Նախաքննությունը շարունակվում է:

Միջոցներ են ձեռնարկվում՝ դեպքի բազմակողմանի և լրիվ հետազոտումն ապահովելու ուղղությամբ:

Լուսանկարը` iravaban.net-ի: