2024 թ. փետրվարին Ռուսաստանի բանտերից մեկում մահացած ընդդիմադիր քաղաքական գործիչ Ալեքսեյ Նավալնիի կինը՝ Յուլյա Նավալնայան հայտարարել է, որ արտասահմանյան երկու երկրի լաբորատորիաներ իր ամուսնուց վերցված կենսաբանական նմուշների հետազոտությունից հետո պարզել են, որ նրան թունավորել են։
Ըստ Յուլյա Նավալնայայի՝ 2024 թ. փետրվարին իրենց հաջողվել է կենսաբանական նմուշներ վերցնել ամուսնուց և դրանք տեղափոխել արտասահման։
«Առնվազն երկու երկրի լաբորատորիաներ միմյանցից անկախ հետազոտել են այդ նմուշները։ Եվ այդ լաբորատորիաները՝ երկու տարբեր երկրներում, հանգել են նույն եզրակացության՝ Ալեքսեյը սպանվել է, իսկ ավելի կոնկրետ՝ նրան թունավորել են», – նշում է Նավալնայան։
Նա նշում է, որ արևմտյան երկրները որևէ իրավական հիմք չունեն քրեական գործընթաց սկսելու համար։
«Կան նաև քաղաքական նկատառումներ։ Նրանք չէին ցանկանա, որ անհարմար ճշմարտությունը բացահայտվի սխալ պահի։ Հիմա ժամանակը չէ», – նշում է Նավալնայան։
Նա նաև պահանջել է լաբորատորիաներից հրապարակել հետազոտության արդյունքները։ Նավալնայան նաև լրագրողներին կոչ է արել միանալ իրեն և պատասխաններ պահանջել։
«Այս արդյունքները հանրային նշանակություն ունեն և պետք է հրապարակվեն։ Մենք բոլորս արժանի ենք իմանալու ճշմարտությունը», – հավելել է նա։
Կրեմլի խոսնակ Դմիտրի Պեսկովին հարց են ուղղել Նավալնայայի հայտարարության վերաբերյալ, սակայն նա նշել է, որ ոչինչ չգիտի դրա մասին և չի կարող մեկնաբանություն տալ։
.gif)
