Դաստիարակը նրբիկ աղջիկ է. նա երեխաներին չի ծեծում

Մարդու իրավունքների պաշտպանի գրասենյակն այսօր հայտարարություն է տարածել Բյուրեղավանի գիշերօթիկ դպրոցում առկա իրավիճակի մասին` նշելով, որ մասնավորապես դաստիարակները, որպես պատժի միջոց՝ երեխաներին ստիպում են կանգնած վիճակում մասնակցել դասապրոցեսին:

Օմբուդսմենի ներկայացուցիչներն ականատես են եղել, թե ինչպես է ուսուցիչը գրիչով հարվածում աշակերտներից մեկի մատներին և անվայել արտահայտություններով դիմում նրան:

Armlur.am-ն այս առնչությամբ զրուցեց Բյուրեղավանի գիշերօթիկ դպրոցի տնօրեն Գայանե Մարգարյանի հետ: Տիկին Մարգարյանն ասաց, որ ինքը խոսել է դաստիարակի հետ, որը ժխտել է, թե հարվածել է  երեխաներից մեկի մատներին:

«Դուք կարող եք գալ և տեղում խոսել դաստիարակների հետ:  Սովորաբար ուսուցիչները գրիչով կարող են խփել սեղանին և ասել` լռե՛ք, մի՛ խոսեք: Դաստիարակն այնպիսի նրբիկ աղջիկ է: Դժվար թե նման բան աներ»,- մանրամասնեց տնօրենը:

Ինչ  վերաբերում է  ժամկետանց սննդի մասին ՄԻՊ-ի բարձրաձայնած փաստին, դպրոցի տնօրենը ևս հերքեց դա:

-Տիկի՛ն Մարգարյան, Մարդու իրավունքների պաշտպանի գրասենյակն իր հայտարարության մեջ խոսում էր սննդի պահպանման պայմանների խախտումների մասին:

-Պահեստապետը կաթը դրել էր սառնարանի խցիկում, իսկ նրբերշիկը` ներքևում: Հակառակը պետք է լիներ: Դա չեմ ժխտում:

-Իսկ, ընդհանուր առմամբ, ՄԻՊ-ի  հայտարարության մեջ միտում տեսնո՞ւմ եք:

-Ես հետո հայտարարությամբ հանդես կգամ: Ես ամեն ինչի մեջ էլ միտում տեսնում եմ: Եթե մի մարդու սպանած լինեին, այսպիսի մեծ արձագանք չէր գտնի: Չեմ հասկանում` ինչի համար է այս աղմուկը:

80 երեխա են դժվար դաստիարակվող ընտանիքներից: Մի փոքր աղմուկ է եղել, մի՞թե կարելի է այդքան արձագանքել: Մի՞թե այս հաստատությունում մի լավ բան չկա:

-Միգուցե ձեր անձի դեմ ինչ-որ բա՞ն ունեն:

-Միգուցե, ունեն: Այս պահին չեմ կարող ոչինչ ասել: Ընթացքը ցույց կտա:

Զրուցեցինք նաև Աշխատանքի և սոցիալական հարցերի նախարարի մամլո խոսնակ Հասմիկ Խաչատրյանի հետ: Վերջինս մեզ հետ զրույցում ասաց, որ նախարարության աշխատանքային խումբը մեկնել է գիշերօթիկ դպրոց, ուսումնասիրություն անցկացրել և չի հայտնաբերել այն, ինչի մասին խոսում է ՄԻՊ-ը:

«Այնուամենայնիվ, ՄԻՊ-ի հայտարարության հիման վրա հարուցվել է քրեական գործ: Մենք սպասում ենք իրավապահների բացահայտումներին»,-եզրափակեց տիկին Խաչատրյանը:

Սոնա Դավթյան