Ռուսաստանը կարող է կասեցնել Հայաստանի հետ գազի, նավթամթերքի և ադամանդների համաձայնագիրը՝ ԵՄ գործընթացի շարունակման դեպքում․ Մարիա Զախարովա

Ռուսաստանը միակողմանիորեն կկասեցնի կամ կդադարեցնի Հայաստանի հետ գազի, նավթամթերքի և չմշակված ադամանդների մատակարարման մասին համաձայնագիրը՝ Եվրոպական միությանը Հայաստանի անդամակցության գործընթացի շարունակման դեպքում, հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։

ՌԴ պաշտոնական լրատվամիջոցների հաղորդմամբ չորեքշաբթի օրը Ռուսաստանի դեսպանությունը Հայաստանում պաշտոնապես հայկական կողմին է փոխանցել Ռուսաստանի էներգետիկայի նախարար Սերգեյ Ցիվիլևի նամակը՝ ուղղված ՀՀ տարածքային կառավարման և ենթակառուցվածքների նախարարությանը, որում նշվում է, որ ԵՄ-ին անդամակցության գործընթացի շարունակման դեպքում Մոսկվան միակողմանիորեն կկասեցնի կամ կդադարեցնի նշված՝ 2013 թվականի դեկտեմբերի 2-ի համաձայնագիրը, ասվում է ՌԴ ԱԳՆ պաշտոնական ներկայացուցչի տարածած հաղորդագրությունում։ Հավելենք, որ ի պատասխան ՀՀ տարածքային կառավարման և ենթակառուցվածքների նախարարության ներկայացուցիչները հայտնել են, որ նման բովանդակությամբ նամակ չեն ստացել։

 Հիշեցնենք, որ 2013 թվականի համաձայնագրով Ռուսաստանը անժամկետ վերացրել էր Հայաստանի համար նավթամթերքի, գազի և ադամանդների արտահանման մաքսատուրքերը։ Դա դարձել էր երկրի՝ ԵԱՏՄ-ին անդամակցության ճանապարհին հաջորդող քայլերից մեկը, որի կազմում այսօր նույնպես ընդգրկված են Ռուսաստանը, Բելառուսը, Ղրղզստանը և Ղազախստանը։ Համաձայնագրով Ռուսաստանը Հայաստանին մատակարարում է նավթամթերք և գազ՝ ներքին սպառման համար նախատեսված ծավալներով՝ հաստատված ինդիկատիվ հաշվեկշիռների շրջանակում, և արգելված է վերաարտահանումը երրորդ երկրներ։

Ապրիլի սկզբին Ռուսաստանի նախագահ Վլադիմիր Պուտինը Հայաստանի վարչապետ Նիկոլ Փաշինյանի հետ հանդիպման ժամանակ նշել էր, որ Ռուսաստանը Հայաստանին գազ է վաճառում 177.5 դոլարով՝ 1000 խորանարդ մետրի համար, մինչդեռ Եվրոպայում այն ներկայում կազմում է մոտ 600 դոլար՝ 1000 խորանարդ մետրի համար։