ԱՄՆ-Իրան բանակցությունները հետաձգվել են այն բանից հետո, երբ Լիբանանում շարունակվող բախումները լրացուցիչ լարվածություն են առաջացրել համաձայնագրի իրականացման շուրջ։
Դիվանագիտական աղբյուրների փոխանցմամբ՝ Իրանը պահանջել է երաշխիքներ, որ Լիբանանում ռազմական գործողությունները կդադարեցվեն նախքան բանակցությունների վերսկսումը։
ԱՄՆ փոխնախագահ Ջեյ Դի Վենսը հաստատել է, որ Շվեյցարիայում նախատեսված բանակցություններին իր մասնակցությունը չեղարկվել է, իսկ հանդիպումները հետաձգվել են։
Վենսի խոսքով՝ բանակցային գործընթացում կիրառվում են այսպես կոչված «ջենթլմենական համաձայնություններ», սակայն Վաշինգտոնը շեշտում է, որ առաջնայինը ոչ թե խոսքերն են, այլ դրանց իրական կատարումը։
Միևնույն ժամանակ տարածաշրջանում իրավիճակը շարունակում է սրվել․ Իսրայելն ու «Հեզբոլլահ»-ը կրկին փոխադարձ հարվածներ են հասցրել։ Լիբանանում վերջին օդային հարվածների հետևանքով զոհվել է առնվազն 18 մարդ, իսկ Իսրայելի բանակը հայտնել է չորս զինծառայողի զոհվելու մասին՝ պատերազմի մեկնարկից ի վեր ամենածանր դեպքերից մեկի ժամանակ։
Բացի այդ, Իրանի Ազգային անվտանգության խորհուրդը հայտարարել է, որ Հորմուզի նեղուցի վերահսկման նոր մարմինը կկարգավորի նավերի անցումը, իսկ առաջիկա 60 օրերի ընթացքում տուրք չի գանձվի նավերից։ ԱՄՆ նախագահ Դոնալդ Թրամփը նախկինում հայտարարել էր, որ նեղուցը պետք է վերաբացվի առանց լրացուցիչ վճարների։
Հեղինակ՝ Անի Վարդանյան
.gif)
