Ֆոն դեր Լեյենը համաձայնագիր է կնքել Ուկրաինայի հետ՝ անօդաչու թռչող սարքերի արտադրությունը մեծացնելու վերաբերյալ

Եվրահանձնաժողովի նախագահ Ուրսուլա ֆոն դեր Լայենը Կիև կատարած այցի ընթացքում հայտարարել է, որ Եվրամիությունն ու Ուկրաինան ստորագրել են այսպես կոչված «դրոնների գործարքը», որի նպատակն է համատեղել Ուկրաինայի կուտակած փորձն ու Եվրոպայի արդյունաբերական ներուժը՝ անօդաչու թռչող սարքերի արտադրությունն ընդլայնելու համար։

Ուկրաինայի Պետականության օրվան նվիրված միջոցառման ժամանակ ունեցած ելույթում Ֆոն դեր Լայենը նշել է, որ անհրաժեշտ է միավորել կողմերի ուժերը։

«Այս համաձայնագիրը կմիավորի ուկրաինական նորարարությունն ու Եվրոպայի արդյունաբերական մասշտաբները»,- ասել է նա։

Մինչ այժմ Ուկրաինան նմանատիպ համաձայնագրեր կնքել էր առանձին երկրների հետ։ Անցած շաբաթ Անկարայում կայացած ՆԱՏՕ-ի գագաթնաժողովի ընթացքում նախագահ Վոլոդիմիր Զելենսկին ստորագրել էր ևս երեք նման փաստաթուղթ՝ դրանց ընդհանուր թիվը հասցնելով իննի։ Սակայն այս համաձայնագիրը առաջինն է, որը նախատեսված է ամբողջ Եվրամիության երկրների և ընկերությունների մասնակցությամբ համագործակցության համար։

Ֆոն դեր Լայենի խոսքով՝ Ուկրաինան պատերազմի ընթացքում ձեռք է բերել եզակի փորձ՝ անօդաչու և հակադրոնային համակարգերի կիրառման ոլորտում, որը կարևոր է նաև Եվրոպայի անվտանգության համար։

«Ձեր ձեռք բերած գիտելիքները՝ ինչպես կիրառել անօդաչու և հակադրոնային համակարգերը, իսկապես եզակի են։ Մենք պետք է օգտվենք այդ փորձից, քանի որ Եվրոպան նույնպես բախվում է նման սպառնալիքների․ ԵՄ բազմաթիվ անդամ երկրներում արդեն արձանագրվել են խախտումներ և տագնապային իրավիճակներ»,- նշել է նա։

Իր հերթին Եվրամիությունը, ըստ ֆոն դեր Լայենի, կարող է Ուկրաինային տրամադրել լայն տեխնոլոգիական և արդյունաբերական հնարավորություններ, ինչպես նաև անվտանգ արտադրական հարթակներ։

Ուկրաինան 2022 թվականի փետրվարին Ռուսաստանի լայնածավալ ներխուժումից հետո կարճ ժամանակում ձևավորել է զարգացած անօդաչու թռչող սարքերի արդյունաբերություն, որն այսօր համարվում է երկրի պաշտպանական կարողությունների առանցքային բաղադրիչներից մեկը։

Միաժամանակ Ուկրաինայի տարբեր շրջաններում շարունակվում են ռուսական հարվածները։ Ուկրաինական իշխանությունների տվյալներով՝ չորեքշաբթի ռուսական հրթիռային և անօդաչու հարձակումների հետևանքով զոհվել է առնվազն 6 մարդ, վիրավորվել՝ ավելի քան 20-ը։

Հարվածների հիմնական թիրախներն էին Օդեսան և Սումին։ Սումիի մարզային իշխանությունները հայտնել են, որ ռուսական ուժերը կիրառել են վեց կառավարվող ավիառումբ, ինչի հետևանքով զոհվել է երեք մարդ, վիրավորվել՝ 17-ը։

Օդեսայի մարզպետ Օլեգ Կիպերի խոսքով՝ տարածաշրջանը հինգերորդ օրն անընդմեջ ենթարկվում է հրթիռային և անօդաչու զանգվածային հարձակումների։ Նրա փոխանցմամբ՝ զոհվել է երեք մարդ, ևս առնվազն երեքը վիրավորվել են։

Ռուսաստանի պաշտպանության նախարարությունը հաստատել է հարվածները՝ հայտարարելով, որ բարձր ճշգրտության ավիացիոն զինամթերքով և հարվածային անօդաչուներով թիրախավորվել են Օդեսայի և Չեռնոմորսկի նավահանգիստների ենթակառուցվածքները, վառելիքի պահեստները և ուկրաինական զինված ուժերի համար բեռ տեղափոխող նավերը։

Միևնույն ժամանակ Ուկրաինայի անօդաչու ուժերի հրամանատարությունը հայտնել է, որ անցած գիշեր ուկրաինական դրոնները Սև ծովում հարվածել են 20 ռուսական նավի, որոնցից 17-ը նավթատար տանկեր էին։

Հիշեցնենք, որ ՄԱԿ-ը նախօրեին հայտարարել էր, որ 2026 թվականի առաջին կիսամյակում Ուկրաինայում խաղաղ բնակիչների զոհերի թիվը կտրուկ աճել է, իսկ հունիսը դարձել է վերջին չորս տարիների ամենամահաբեր ամիսը քաղաքացիական բնակչության համար։