ՔՊ-ական մարզպետ Հայկ Ղալումյանը լծվել է Մխիթար Խաչիկյանի քարոզարշավին․ պետական միլիոններն ու միլիարդները՝ նախընտրական ֆոնին

ArmLur.am-ը տեղեկացրել է, որ նոյեմբերի 29-ին կայանալիք ՏԻՄ ընտրություններին ընդառաջ՝ Տավուշի մարզպետ Հայկ Ղալումյանը ակտիվորեն ներգրավվել է Նոյեմբերյանում ՔՊ-ի թեկնածու Մխիթար Խաչիկյանի քարոզարշավում։

Մարզպետը ոչ միայն հրապարակայնորեն ներկայացրել է ՔՊ թեկնածուին, այլեւ նրա առաջադրումը ներկայացրել է համայնքում իշխանությունների իրականացրած ծրագրերի ու պետական ֆինանսավորումների մասին ծավալուն հաշվետվության ուղեկցությամբ։

Մասնավորապես, Հայկ Ղալումյանը հայտարարել է, որ Մխիթար Խաչիկյանը նոյեմբերի 29-ին Նոյեմբերյան խոշորացված համայնքում կայանալիք ընտրություններում «Քաղաքացիական պայմանագիր» կուսակցության թեկնածուն է։ Դրան զուգահեռ մարզպետը ներկայացրել է համայնքում վերջին տարիներին իրականացված պետական եւ սուբվենցիոն ծրագրերի ֆինանսական պատկերը։

Ըստ մարզպետի հրապարակած տվյալների՝ բացառապես պետական բյուջեի միջոցներով Նոյեմբերյանում իրականացվել է 11 մլրդ 186 մլն դրամի ծրագիր։ Սուբվենցիոն ծրագրերի ընդհանուր արժեքը կազմել է 4 մլրդ 180 մլն դրամ, որից պետական բյուջեի մասնակցությունը եղել է 2 մլրդ 780 մլն դրամ, իսկ համայնքի ներդրումը՝ 1 մլրդ 400 մլն դրամ։

Բացի այդ, Ղալումյանը նշել է, որ վերջին երեք տարիներին պետական դոտացիաներն ավելացել են 850 մլն դրամով, իսկ բնակապահովման պետական աջակցության 912 ծրագրի շրջանակում հատկացվել է 15 մլրդ 212 մլն դրամ։

Փաստորեն, մարզպետը ՔՊ թեկնածուին ներկայացնելու հետ մեկտեղ հանրության ուշադրությունը հրավիրել է նաեւ իշխանությունների իրականացրած ծրագրերի եւ հատկացված ֆինանսական միջոցների վրա։ Այս հանգամանքը հատկապես ուշագրավ է նախընտրական շրջանում, երբ պետական պաշտոնյաների հրապարակային ակտիվությունը կարող է հարցեր առաջացնել պետական կառավարման եւ կուսակցական քարոզչության սահմանների վերաբերյալ։

Հատկանշական է, որ Հայկ Ղալումյանը Տավուշի մարզում իշխանության առանցքային ներկայացուցիչներից է եւ Նիկոլ Փաշինյանի մերձավոր քաղաքական շրջապատի անդամ։ Նրա ակտիվ մասնակցությունը Նոյեմբերյանի ընտրական գործընթացին եւս մեկ անգամ ցույց է տալիս, թե որքան մեծ նշանակություն է ՔՊ-ն տալիս այս համայնքի ընտրություններին։

Իսկ ո՞վ է Մխիթար Խաչիկյանը, որի թեկնածությունը ներկայացնելու համար մարզպետն անձամբ է հանդես գալիս։

Խաչիկյանը ծնվել է 1979 թվականին։ Սովորել է Հայաստանի պետական տնտեսագիտական համալսարանի ֆինանսահաշվային ֆակուլտետում, ապա՝ Ճարտարապետության եւ շինարարության Հայաստանի ազգային համալսարանի քաղաքային տնտեսության ֆակուլտետի մագիստրատուրայում։ Հինգ տարի աշխատել է որպես Դովեղի միջնակարգ դպրոցի ուսուցիչ՝ դասավանդելով մաթեմատիկա եւ կիրառական տնտեսագիտություն։ Ութ տարի եղել է Նոյեմբերյանի ավագանու անդամ, իսկ 2016 թվականից ղեկավարում է «Գազպրոմ Արմենիա»-ի «Տրանսգազ» ՍՊԸ-ի Դիլիջանի գծային շահագործման մասնաճյուղը։

Նոյեմբերյանի ընտրություններին ՔՊ-ն մասնակցում է 51 հոգանոց ցուցակով։ Ցուցակի երկրորդ համարում Տավուշի մարզպետի տեղակալի օգնական Արարատ Թամազյանն է։

Այսպիսով, Նոյեմբերյանում ՔՊ-ի ընտրական պայքարը միայն տեղական թեկնածուի առաջադրմամբ չի սահմանափակվում։ Մարզային իշխանության ներկայացուցիչների ակտիվությունը, պետական ծրագրերի ֆինանսական ծավալների հրապարակումը եւ թեկնածուի շուրջ իշխանական շրջանակների համախմբումը ընտրարշավի ուշագրավ առանձնահատկություններից են։

Հարց է առաջանում՝ արդյոք մարզպետի այս ակտիվությունը պարզապես համայնքի զարգացման ծրագրերի մասին իրազեկո՞ւմ է, թե՞ պետական պաշտոնն օգտագործվում է նաեւ ՔՊ թեկնածուի նախընտրական դիրքերն ամրապնդելու համար։

Սոնա Գրիգորյան