2008-2012 թթ.-ին ՀՀԿ-ն և ԲՀԿ-ն կոալիցիոն գործընկերներ էին : Հետագայում ԲՀԿ-ն, երբ դուրս եկավ կոալիցիայից, սկսեց քննադատել իշխանություններին երկրում առկա խնդիրների համար, ՀՀԿ-ականները պարբերաբար էին հիշեցնում կոալիցիոն գործընկեոջը, որ նրանք ևս պատասխանատու են երկրի առջև ծառացած խնդիրների համար: Բացի ԲՀԿ-ին մեղադրելուց` ՀՀԿ-ականների համար լավ առիթ էր նաև 2008-20092թ.-ի ֆինանսատնտեսական ճգնաժամը, երբ տնտեսական ձախողումների հիմնական պատճառը ըստ իշխանության ներկայացուցիչների՝ ճգնաժամն է:
Armlur.am-ը ՀՀԿ պատգամավոր Լեռնիկ Ալեքսանյանից հետաքրքրվեց` եթե կառավարության այս ծրագիրն էլ չիրականանա, հիմա ինչպես է արդարանալու ՀՀԿ-ն, հերթապահ ի՞նչ հայտարարություններ է հնչեցնելու: Չէ՞ որ հիմա իշխող կուսակցությունը մնացել է միայնակ:
Լեռնիկ Ալեքսանյանը նախ ասաց, որ ինքը չի ընդունել և ընդունում կոալիցիոն կառավարման սկզբունքը , քանի որ դա հեղհեղուկ միավորում է. «Իմ կարծիքով կոլեկտիվ պատասխանատվությունն ամենավատ բանն է: Կոմունիստական կուսակցությանը դրա համար էին մեղադրում: Պատասխանատվությունը պետք է ստանձնի մեկ ուժ»:
«Այսինքն` ուրախ ե՞ք, որ ԲՀԿ-ը և ՕԵԿ-ը այլևս ձեր կոալիցիոն գործընկերները չեն»,- հետաքրքրվեց մեր թղթակիցը:
«Ոչ ուրախ եմ, ոչ տխուր: Մենք բաց ենք բոլոր ուժերի առաջ: Բայց դա չի նշանակում, որ առանց այլ քաղաքական ուժերի մենք չենք կարող»,- պատասխանեց քաղաքական գործիչը:
Լեռնիկ Ալեքսանյանը կարծում է, որ կառավարության այս ծրագիրը չի տապալվի: «Եթե տապալվի, կմտածենք` ինչ ենք ասելու»,- եզրափակեց իշխող կուսակցության ներկայացուցիչը:
Սոնա Դավթյան
.gif)
