Ուզում ենք, որ մեզ ընդունի Սերժ Սարգսյանը. Տրետուքի բնակիչներ

Վարդենիսի շրջանի Տրետուք գյուղի բնակիչներն այսօր նախագահական նստավայրի դիմաց էին: Ինչպես արդեն տեղեկացրել էր armlur.am-ը, տրետուցիքներին ընդունել էին ՀՀ նախագահի նստավայրում, որտեղ նրանք ներկայացրել էին իրենց խնդիրը:

Հիշեցնենք, որ նրանք պահանջում են չեղյալ համարել հունիսի 8-ին կայացած ՏԻՄ ընտրության արդյունքները: Մասնավորապես` ընտրությունների նախնական արդյունքների համաձայն` 80 ձայնով հաղթող էր ճանաչվել Հովհաննես Երանոսյանը, 63 ձայն ստացել էր  գործող գյուղապետը` հակառակորդ թեկնածուն ԲՀԿ-ից` Ալիկ Եղիազարյանը: Այսօր առավոտյան, սակայն, պարզ է դարձել, որ հաղթող թեկնածուն գործող գյուղապետն է, իսկ անվավեր քվեաթերթիկներն էլ վավեր են ճանաչվել: Տրետուքցիները, սակայն, չեն հաշտվում ընտրության արդյունքների հետ և պատրաստ են տեր կանգնել իրենց ձայներին:

Տրետուքի բնակիչ Սերգեյ Քոչարյանը armlur.am-ի հետ զրույցում ասաց, որ ՀՀ նախագահի նստավայրում իրենց հստակ ոչինչ չասացին: «Մեզ ասացին՝ գնացե՛ք ԿԸՀ, բայց ի՞նչ տարբերություն՝ ԿԸՀ,  թե՝ մարզային  հանձնաժողով, օրենքը օրենք չի՞: Բայց մենք ոչ մի տեղ չենք գնալու: Մենք սպասում ենք, որ մեզ ընդունի Սերժ Սարգսյանը»,- ասաց մեր զրուցակիցը:

Զրուցեցինք նաև ընտրությունների նախնական արդյունքներով հաղթած ՀՀԿ-ական թեկնածու Հովհաննես Երանոսյանի հետ: Վերջինիս համար անհասկանալի է` ինչպես եղավ, որ 1 օրվա մեջ ընտրության արդյունքները փոխվեցին:

«Ինձ ուղղակի հետաքրքրիր է`ոնց կարող է դատարկ  քվեաթերթիկը վավեր լինել»,- ասաց Երանոսյանը:

Նրա խոսքով` ընտրությունից մի քանի օր առաջ գյուղում խոսակցություններ էին տարածվել այն մասին, որ եթե Հովհաննես Երանոսյանի կողքին ժողովուրդ կա կանգնած, մենք էլ փող ունենք:

Սոնա Դավթյան