ՀԱՐՑ. 1993 թվականին 2500 մետր ինքնակամ հող ենք զբաղեցրել շամպայնի գործարանի մոտակա տարածքի ձորակում եւ այդ հողամասում կառուցել ենք 18 քմ շինություն: 1997-ից 2003 թվականների ընթացքում ոռոգման համար բոլոր վճարումները կատարել ենք, ունենք բոլոր կտրոնները: Այժմ կարո՞ղ եմ այդ հողը սեփականաշնորհել կամ վարձակալությամբ վերցնել: Դրանց համար ի՞նչ փաստաթղթեր են անհրաժեշտ: Եթե այդ նույն հողը մեկ ուրիշը գնի, իմ քսան  տարվա մշակած հողի ու պտղատու ծառերի համար օրենքով սահմանված կարգով փոխհատուցում կտա՞:

ՊԱՏԱՍԽԱՆ. Շամպայնի գործարանի հարակից տարածքում սեփականաշնորհման հնարավորության վերաբերյալ Ձեր թերթի ընթերցող Վարդգես Գրիգորյանի հարցման կապակցությամբ տեղեկացնում ենք, որ շենքերի, շինությունների, ինչպես նաեւ հողատարածքների սեփականության իրավունքով ձեռք բերումը եւ օրինականացումը կատարվում է օրենքով սահմանված կարգով, սակայն յուրաքանչյուր հասցեի համար անհրաժեշտ է առանձին ուսումնասիրություն: Քննարկման համար պետք է նշել նաեւ գործառնական նշանակության մասին:

«ԺՈՂՈՎՈՒՐԴ».  Թեեւ պարտաճանաչ կերպով ջրի վարձավճարը մուծելը փոքր խթան է տարածքի սեփականաշնորհման համար, բայց փաստորեն որոշակի գործընթացներ հաղթահարելուց հետո քաղաքացին կարող է տարիներով իր կողմից մշակված տարածքի լիիրավ սեփականատերը դառնալու հնարավորություն ստանալ: Եթե մինչեւ հիմա մեր ընթերցողին ապօրինաբար տարածք զբաղեցնելու պատճառաբանությամբ չեն հեռացրել շամպայնի գործարանի հարակից տարածքից, կարելի է ենթադրել, որ ի հաշիվ վճարելիք տուրքերի` կարող է նաեւ տարածքը սեփականաշնորհելու հնարավորություն ստեղծվել: