ԵՏՄ ՄԻԱՍՆԱԿԱՆ ՏՆՏԵՍԱԿԱՆ ՏԱՐԱԾՔԻ ԱՆՈՒՆԸ ԿԱ, ԱՄԱՆՈՒՄԸ՝ ՈՉ

«Ժողովուրդ» օրաթերթի խմբագրություն են դիմել ՀՀ մի քանի քաղաքացիներ, որոնք Ռուսաստանի Դաշնությունից ՀՀ են ներկրել «Նիվա» եւ «2106» մակնիշի նոր արտադրության, չօգտագործված ավտոմեքենաներ: Քաղաքացիների խոսքով` անցակետում իրենցից գանձել են 14500 եւ 2000 դրամ գումար: Սակայն դա էլ քիչ էր՝ նրանցից ամսական գանձվում է 20000 դրամ` օտարերկրյա պետհամարանիշներով ՀՀ տարածքում վարելու համար:

Վրդովված քաղաքացիները, որոնք մեքենան գնել էին ՌԴ-ում՝ վարկային պայմանագրի միջոցով, խնդրում էին օգնել` պարզելու, թե ինչի՞ համար են իրենցից գանձվել այդ գումարները, եւ ինչո՞ւ են օտարերկրյա պետհամարանիշներով վարելու համար վճարում այդքան գումար: Ավելին` քաղաքացիներից մեկն անգամ տեղեկացրեց, որ «ՎՏԲ Հայաստան» բանկի միջոցով վարկային պարտավորութունը մարելիս, ամեն անգամ իրենից գանձում են 3000 դրամ, նույնիսկ եթե գումարի փոխանցումը չի հաջողվում տեխնիկական ինչ-որ խնդիրների պատճառով: Քաղաքացիների բարձրացրած խնդիրների շուրջ «Ժողովուրդը» փորձեց պարզաբանումներ ստանալ համապատասխան գերատեսչություններից:
Նախ՝ ամենամսյա պետհամարանիշների համար գանձվող գումարի մասին պարզաբանումներ փորձեցինք ստանալ ՀՀ ՃՈ-ից: Սակայն ՀՀ ճանապարհային ոստիկանության հեռախոսահամարներից ոչ մեկով աշխատանքային ողջ օրվա ընթացքում չպատասխանեցին մեր զանգերին: Ի վերջո, մենք կապվեցինք ՀՀ ոստիկանության հասարակության եւ տեղեկատվության կապերի վարչության պետ Աշոտ Ահարոնյանի հետ, ով նշված հարցի շուրջ «Ժողովուրդ»-ին ասաց.«Հարցի առնչությամբ պետք է դիմեք ՀՀ ԿԱ ՊԵԿ»:
Հետեւելով ուղղորդմանը՝ տեղեկություններ փորձեցինք ստանալ ՀՀ ԿԱ ՊԵԿ-ից, որտեղից ի պատասխան մեր հարցմանը` տեղեկացրին. «Բնապահապանական վճարների դրույքաչափերի մասին» ՀՀ օրենքի 2-րդ հոդվածի է) կետի համաձայն` այլ պետություններում հաշվառված ՀՀ մուտք գործող կամ շահագործվող ավտոտրանսպորտային միջոցներից օդային ավազան վնասակար նյութերի արտանետման դիմաց բնապահպանական վճարի դրույքաչափը մարդատար ավտոմեքենաների համար սահմանված է 3750 դրամ` նորմաների սահմաններում կատարվող արտանետումների դեպքում:
«Ճանապարհային վճարների մասին» ՀՀ օրենքի 5-րդ հոդվածի 1-ին մասի համաձայն` այլ պետություններում գրանցված տրանսպորտային միջոցներով ավտոմոբիլային ճանապարհներից օգտվելու համար վճարը յուրաքանչյուր մուտքի համար գանձվում է հետեւյալ տասնհինգօրյա դրույքաչափով` թեթեւ մարդատար (մինչեւ 7 նստատեղով) ավտոմեքենաների համար` 10000 դրամ:
Հաշվի առնելով, որ գրությունում նշված ավտոմեքենան հաշվառված (գրանցված) է օտարերկրյա պետությունում` ՌԴ-ում, ուստի ՀՀ տարածք մուտք գործելու եւ ՀՀ տարածքում գտնվելու համար գանձվում են բնապահպանական եւ ճանապարհային վճարներ»:
Գանձվող գումարների վերաբերյալ ներկայացված իրավական հիմնավորումները, թերեւս, հասկանալի են: Սակայն այդ դեպքում հարց է առաջանում՝ իսկ ուր մնացին ԵՏՄ անդամ երկրների՝ մեկ միասնական տնտեսական, մաքսային տարածք դառնալու մասին բարձրագոչ հայտարարությունները: Մյուս կողմից էլ, աչքի առջեւ ունենալով ՌԴ-ից ներմուծվող ավտոմեքենաների մաքսատուրքերի հետ կապված պատմությունը, երբ Հայաստանը տեւական ժամանակ, հակառակ ԵՏՄ-ի կանոնակարգերի, շարունակում էր գանձել 20% ԱԱՀ, եւ դա վերանայվեց միայն ԵՏՀ նախարար Տ. Վալովայայի բարձրաձայնումից հետո, չենք կարող վստահ լինել, որ այս դեպքում եւս բերված իրավական հիմնավորումները չեն հակասում ԵՏՄ միասնական իրավապայմանագրային դաշտին:
Ինչ վերաբերում է հարցին, թե ինչ նպատակով է Ռուսաստանի Դաշնությունում վերցված վարկային պարտավորությունը «ՎՏԲ Հայաստան» բանկի միջոցով մարելիս ամեն անգամ գանձվում 3000 դրամ, բանկից մեզ տեղեկացրին, որ իրենք հստակ չեն կարող պատասխանել, քանի որ դրա համար հարկավոր է ծանոթանալ քաղաքացու եւ բանկի միջեւ կնքված պայմանագրին:
Ահա, այսպիսի անհասկանալի կանոններ են գործում Ս. Սարգսյանի «մեկ գիշերվա մեջ» կայացրած որոշման արդյունքում մեզ պարտադրված մեկ միասնական՝ եվրասիական տնտեսական տարածքում:

ՎԱՀԱԳՆ ՀԱԿՈԲՅԱՆ

 
ԱԳՆ-Ն ԳՈՒՄԱՐ Է ՊԱՀԱՆՋԵԼ ԿԱՌԱՎԱՐՈՒԹՅՈՒՆԻՑ

ՀՀ արտաքին գործերի նախարարությունը դիմել է կառավարությանը եւ խնդրել այս տարվա երկրորդ կիսամյակի եւ 2017 թվականի ՀՀ մուտքի արտոնագրերի պիտակների տպագրության համար գումար տրամադրել:

Բանն այն է, որ նախորդ տարվա երկրորդ եռամսյակում ԱԳՆ-ն, հաշվի առնելով նախորդ տարիների վիճակագրությունը, համաձայն որի՝ տարեկան տրամադրվում էր 180-190 հազար հատ ՀՀ մուտքի արտոնագիր, կանխատեսումներ է արել եւ որոշել, որ նախարարության պահեստում առկա պաշարը կբավարարի նաեւ այս տարվա պահանջարկը: Իսկ նախարարության պահեստում նախորդ տարվա հուլիսի 14-ի դրությամբ առկա պաշարը կազմել է 258 հազար 450 հատ: «Ժողովուրդ»-ը տեղեկացավ, որ հենց այս պատճառով նախարարության այս տարվա գնումների պլանում ՀՀ մուտքի արտոնագրերի տպագրություն չի նախատեսվել: Այս թեմայի շուրջ ԱԳՆ-ն ՀՀ կառավարության այսօրվա նիստին նախագիծ է ներկայացնելու, որով պահանջելու է իրեն հատկացնել 31 մլն 800 հզ. դրամ՝ մուտքի արտոնագիր տպագրելու համար: Նշված գումարով նախատեսվում է տպագրել մոտ 120 հազար վիզա, որն ըստ ԱԳՆ-ի կանխատեսման՝ կբավարարի շուրջ 16 ամիս:
«Ժողովուրդ»-ին հայտնի դարձավ, որ այս տարվա օգոստոսի 22-ի դրությամբ ԱԳՆ-ի պահեստում կա ՀՀ մուտքի 6 հազար 500 հատ արտոնագիր, որը կարող է բավարարել 1-2 ամիս:
Նախորդ տարվա ամռանը Իրանի նկատմամբ կիրառված միջազգային պատժամիջոցների վերացումը հանգեցրեց Իրանից դեպի Հայաստան տուրիստների շեշտակի աճի: Եւ անցած տարվա ընթացքում տրամադրված բոլոր ՀՀ մուտքի արտոնագրերի շուրջ 70 տոկոսը բաժին է ընկել հենց Իրանի քաղաքացիներին: Տեղեկացնենք, որ անցած տարվա ընթացքում տրամադրվել է շուրջ 194 հազար մուտքի վիզա, որից 134 հազարը Իրանի եւ 60 հազարը՝ այլ երկրների քաղաքացիներին: Իսկ այս տարվա 7 ամիսների ընթացքում, չհաշված Իրանի քաղաքացիներին, տրամադրվել է 37 հազար վիզա: Հաշվի առնելով սա՝ ԱԳՆ-ն համոզված է, որ այս տարվա վերջին 4 ամիսների պահանջարկը կկազմի մինչեւ 25 հազար վիզա, իսկ 2017 թվականի պահանջարկը՝ շուրջ 70 հազար վիզա:

Ս. Հ.

 
ԿԱՌԱՎԱՐՈՒԹՅՈՒՆԻՑ ՀՈՒՅՍՆԵՐԸ ԿՏՐԵԼ ԵՆ
Մի քանի օր է, ինչ Նոյեմբերյանի տարածաշրջանի սահմանամերձ Բաղանիս գյուղում սկսվել են առկա գազատար ցանցից առանձնատների գազաֆիկացման աշխատանքները: Բաղանիս համայնքի ղեկավար Նարեկ Սահակյանը հայտնեց, որ Տավուշի գազամատակարարման-գազաբաշխման միավորման Նոյեմբերյանի գրասենյակի աշխատակիցները Բաղանիսի 10 առանձնատներ գազի խողովակներ են անցկացրել, գյուղի եւս 4 ընտանիք գազատարին միանալու ցանկություն է հայտնել:
«Գազպրոմ Արմենիա» ընկերությունը գազատար ցանցը առանձնատներին միացնելու համար եռակցվող խողովակի յուրաքանչյուր գծամետրի հաշվով 3700 դրամ է պահանջում: Գազատարին միանալու համար բաղանիսցի ընտանիքներից մեկը 54 հազար դրամ է վճարել: Բաղանիսում ընտանիք կա, որի տունը համեմատաբար հեռու լինելով գազատարից՝ ցանցին միանալու համար 210 հազար դրամ է վճարել: Սահմանամերձ Բաղանիսում քիչ ընտանիքներ ունեն ֆինանսական նման հնարավորություն: Սահմանագոտու բնակիչները հույսները կտրել են, որ կառավարությունը ֆինանսապես կօգնի իրենց տները գազաֆիկացնելու գործում: Նման խոստում վերջերս տվել էր նախկին վարչապետ Հովիկ Աբրահամյանը, որը, սակայն, հրաժարական տվեց՝ չհասցնելով իրագործել իր այդ խոստումը:

ՈՍԿԱՆ ՍԱՐԳՍՅԱՆ
Տավուշ

ՀԱՅԿԱԿԱՆ ԸՆՏԱՆԻՔԸ ՎԹԱՐԻ Է ԵՆԹԱՐԿՎԵԼ
Ռուսաստանի Կրասնոդարի երկրամասի Թեմրյուկսկի շրջանում Նովոռոսիյսկ Կերչենսկի մայրուղում հայկական բազմազավակ ընտանիք է վթարի ենթարկվել, որի մասին հաղորդում է Rusarminfo-ն՝ հղում անելով Կրասնոդարի երկրամասի ՆԳՆ ԳՎ մամուլի ծառայությանը:
«Մեծ արագությամբ ընթացող ավտոբուսը բախվել է մեքենային, որում 6 մարդ է գտնվել: Hyundai Galloper մեքենայում են գտնվել ամուսիններն ու նրանց 4 երեխաները: Ընտանիքի հայրն ու 13-ամյա երեխան տեղում մահացել են, ընտանիքի մյուս անդամները լուրջ վնասվածքներ են ստացել եւ տեղափոխվել են հիվանդանոց»,- հայտնում է «Կրասնոդար մեդիա»-ն:
Վթարի փաստով հետաքննություն է ընթանում, իրավապահները ճշտում են վթարի հանգամանքները: