Արամ Ա Վեհափառ Հայրապետը Դետրոյթում հանդիպումներ է ունեցել, հայտնում են Կաթողիկոսության մամուլի ծառայությունից․
«Տիթրոյթ իր կեցութեան ընթացքին, Չորեքշաբթի, 23 Հոկտեմբեր 2024-ին, Ն.Ս.Օ.Տ.Տ. Արամ Ա. Վեհափառ Հայրապետը այցելեց Ալեք եւ Մարի Մանուկեան վարժարան, ուր ջերմ ընդունելութեամբ դիմաւորուեցաւ վարժարանի տնօրէնութեան, անձնակազմին ու աշակերտութեան կողմէ: Բարի գալուստի խօսքէն ետք, վարժարանի աշակերտները ներկայացուցին հայ երգով, պարով ու արտասանութիւններով գեղարուեստական ճոխ յայտագիր մը: Խօսքեր արտասանեցին դպրոցի տնօրէի Սոնիա Գալֆայեան եւ հայկական բաժնի ուսուցչապետ Սեպուհ Աւետիսեան։
Աւարտին, Վեհափառ Հայրապետը բարձր գնահատեց վարժարանի տնօրէնութիւնն ու ուսուցչաց կազմը՝ անոնց ազգանուէր գործունէութեան համար: Խօսքը ուղղելով աշակերտութեան՝ Հայրապետը ըսաւ, թէ հայ դպրոցը, հայ եկեղեցւոյ կողքին, մեր ազգին ինքնութեան պահպանութեան կռուանը դարձած է: Մենք հայ դպրոցին մէջ կը հայանանք եւ կը հաղորդակցինք մեր ազգային հարուստ ժառանգութեան: Կարելի չէ պատկերացնել հայ կեանքը առանց հայ դպրոցի ներկայութեան: Նորին Սրբութիւնը ընդգծեց, թէ հայ դպրոցը նուիրական հաստատութիւն է. ուստի, գիտակցութեամբ պէտք է հայ դպրոցին մօտենանք, որովհետեւ մեր ազգի ապագան կախեալ է հայ դպրոցէն: Իր խօսքի աւարտին Վեհափառ Կաթողիկոսը շեշտեց հայակերտման անհրաժեշտութիւնը եւ ըսաւ, թէ հայ դպրոցը միայն ուսում ջամբելու տեղ չէ, այլ այն վայրն է, ուր հայը ճշմարտօրէն եւ գիտակցօրէն հայ կը դառնայ:
դ
Նշենք, որ Վեհափառ Հայրապետը առիթ ունեցաւ հանդիպում մը ունենալու բարձր դասարանի աշակերտներուն հետ, որոնք Նորին Սրբութեան ուղղեցին իրենց հարցումները՝ երիտասարդութեան դերակատարութեան, ինչպէս նաեւ դիմագրաւող մարտահրաւէրներուն շուրջ։
Դպրոցի այցելութենէն ետք, Նորին Ս. Օծութիւնը այցելեց դպրոցի կողքին գտնուող Սուրբ Յովհաննէս եկեղեցի, ուր դիմաւորուեցաւ հոգեւոր հովիւ Հոգշ. Տ. Արէն Աբղ. Ճէպէճեանի կողմէ եւ իր աղօթքը բարձրացուց եկեղեցւոյս ու ազգիս բարօրութեան ու բարգաւաճման համար։
— — — — —
ՀԱՆԴԻՊՈՒՄ ՏԻԹՐՈՅԹԻ ԵԿԵՂԵՑՒՈՅ ՅԱՐԱԿԻՑ ՄԱՐՄԻՆՆԵՐՈՒՆ ԵՒ ՔՈՅՐ ԿԱԶՄԱԿԵՐՊՈՒԹԻՒՆՆԵՐՈՒՆ ՀԵՏ
Նոյն օրը, Վեհափառ Հայրապետը Սուրբ Սարգիս եկեղեցւոյ սրահին մէջ հանդիպում ունեցաւ Տիթրոյթի եկեղեցւոյ յարակից մարմիններուն եւ հայկական կազմակերպութիւններու ու միութիւններու ներկայացուցիչներուն հետ։
Հանդիպման ընթացքին Նորին Սրբութիւնը ըսաւ, որ քոյր կազմակերպութիւններ ըլլալ կը նշանակէ մէկ ընտանիքի անդամ ըլլալ: Այդ ընտանիքը մեր ազգն է: Համայնքը կը դառնայ հզօր ու կազմակերպ, երբ անոր կեանքին մէջ գործող կառոյցները ներդաշնակօրէն կը կատարեն իրենց վստահուած առաքելութիւնը՝ միշտ նպատակ ունենալով համայնքին բարօրութիւնը: Այս առիթով, Հայրապետը իր ջերմ գնահատանքը յայտնեց միութիւններուն տարած աշխատանքին եւ յաջողութիւն մաղթեց անոնց ծրագիրներուն իրականացման»։
.gif)
