ԲՀԿ խմբակցության քարտուղար Նաիրա Զոհրաբյանից armlur.am-ը փորձեց ճշտել` արդյոք ԲՀԿ-ի շարքերը լքած Դավիթ Քոչարյանին կհետևեն այլ ԲՀԿ-ականներ, հատկապես նրանք, ովքեր գործարար հատվածի ներկայացուցիչներ են:
Նաիրա Զոհրաբյանը նախ ասաց, որ Դավիթ Քոչարյանը չի լքել կուսակցությունը, նա պարզապես վայր է դրել պատգամավորական մանդատը, որը րոպեներ առաջ հաստատել է նաև ԱԺ մամուլի վարչության պետը:
«Դավիթ Քոչարյանն անցած շաբաթ դիմում է ներկայացրել՝ պատգամավորական իր մանդատը վայր դնելու վերաբերյալ: Մնացած ձեր ենթադրություններն իրականության հետ առնչություն չունեն»,- ասաց ԲՀԿ խմբակցության քարտուղարը:
-Տիկին Զոհրաբյան, այսինքն` Դուք հերքում եք մամուլի այն հրապարակումները, որոնց համաձայն` մի շարք ԲՀԿ պատգամավորներ կհեռանան կուսակցությունից կամ վայր կդնեն իրենց պատգամավորական մանդատը:
-Բնականաբար հերքում եմ: Դավիթ Քոչարյանը հրաժարվել է իր պատգամավորական մանդատից, որը չի նշանակում, որ նա հեռացել է կուսակցությունից: Դրանք տարբեր բաներ են:
-Իսկ ինչպե՞ս եք մեկնաբանում ՀԱԿ-ի այն հայտարարությունը, թե ընդդիմադիր քաղաքական ուժերի քառյակի հիմնական խնդիրը պետք է դառնա Սերժ Սարգսյանի ռեժիմի հեռացումը:
-Կներեք, ժամանակ չի եղել և ես այդ հայտարարությունը չեմ կարդացել:
Սոնա Դավթյան
.gif)
