Ապրիլի 14-ին ՀՀ սփյուռքի նախարարությունում ՀՀ սփյուռքի նախարարի պաշտոնակատար Հրանուշ Հակոբյանը և Համաշխարհային հայկական կոնգրեսի և Ռուսաստանի հայերի միության նախագահ Արա Աբրահամյանը ստորագրել են ՀՀ սփյուռքի նախարարության, «Համաշխարհային հայկական կոնգրես» հայկական հասարակական միավորումների միջազգային միության, «Ռուսաստանի հայերի միություն» համառուսաստանյան հասարակական կազմակերպության միջև համագործակցության հուշագիր:
Այս մասին տեղեկացնում է ՀՀ սփյուռքի նախարարության մամուլի և հասարակայնության հետ կապերի վարչությունը:
Հրանուշ Հակոբյանը բարձր է գնահատել Համաշխարհային հայկական կոնգրեսի և Ռուսաստանի հայերի միության հետ արդյունավետ համագործակցությունը և նշել, որ այս հուշագիրը երկրորդն է կողմերի միջև: Նախորդ 5 տարիների ընթացքում նրանք ակտիվ մասնակցություն են ունեցել սփյուռքի նախարարության ծրագրերին: Այժմ համագործակցության շրջանակն ընդլայնելու անհրաժեշտություն է առաջացել:
Հրանուշ Հակոբյանը նշել է, որ կատարելով Հայաստանի Հանրապետության Նախագահի հանձնարարությունը՝ ակտիվացնել համագործակցությունը համահայկական կառույցների հետ, Սփյուռքի նախարարությունն այսօր ավելի բարձր մակարդակի է բարձրացնում համագործակցությունը համահայկական ամենախոշոր կառույցներից մեկի հետ:
Համաշխարհային հայկական կոնգրեսի և Ռուսաստանի հայերի միության նախագահ Արա Աբրահամյանը ևս շնորհակալություն է հայտնել ՀՀ սփյուռքի նախարարությանը արդյունավետ համագործակցության համար:
Կարևորելով Հայաստան-Սփյուռք գործակցությանն աջակցումը, հայ ազգային ինքնության պահպանումն ու ամրապնդումը Սփյուռքում, ուծացման կանխարգելումը, ինչպես նաև հայոց ցեղասպանության 100-րդ տարելիցին նվիրված նախապատրաստական աշխատանքների իրականացումը՝ հուշագրով կողմերը նախատեսում են համատեղ ծրագրեր իրականացնել մշակութային, գիտակրթական ոլորտներում, համայնքների զարգացման, Սփյուռքում պատմամշակութային ժառանգության պահպանման ոլորտներում:
Համագործակցության շրջանակներում հայկական կրթական ծրագրեր կիրականացվեն Սփյուռքի հայկական ազգային կրթական կառույցներում, մեկօրյա (կիրակնօրյա) դպրոցներում, մշակութային և մանկապատանեկան ստեղծագործության կենտրոններում:
Նախատեսվում է Սփյուռքի հայկական դպրոցներին ապահովել ուսումնական և ուսումնաօժանդակ գրականությամբ, իրականացնել ուսանողների փոխանակման ծրագրեր, Սփյուռքի մտավոր ներուժի բացահայտման նպատակով ՀՀ ԳԱԱ-ի, ստեղծագործական, մասնագիտական միությունների հետ համատեղ կազմակերպել մասնագիտական համաժողովներ, կլոր սեղաններ, հավաք-հանդիպումներ:
Համայնքային կառույցներին աջակցելու նպատակով մշակվելու և իրականացվելու են համատեղ ծրագրեր՝ ուղղված հայկական համայնքների ինքնակազմակերպման ու կայացման հիմնախնդիրների լուծմանը, միջհամայնքային համագործակցության ամրապնդմանը:
Կողմերը վերահաստատում են պատրաստակամությունը՝ շարունակել համագործակցությունը «Հայապահպանության գործում նշանակալի ավանդի համար» համահայկական ամենամյա մրցանակաբաշխության իրականացման գործում:
.gif)
