Ֆինլանդիայի շրջակա միջավայրի նախարարությունը հայտնել է, որ այս ամսվա ընթացքում իրականացված հատուկ գործողության արդյունքում Երկրորդ համաշխարհային պատերազմի ժամանակ խորտակված Ilmarinen ռազմանավից դուրս է բերվել մոտ 60 հազար լիտր մազութ։ Մասնագետների գնահատմամբ՝ նավի ներսում դեռևս մնում է շուրջ 40 հազար լիտր վառելիք, որի հեռացումը նախատեսվում է հաջորդ տարի։
1941 թվականին Ուտո կղզու մոտ ծովային ականի բախվելու հետևանքով խորտակված Ilmarinen-ը համարվում է Բալթիկ ծովի ամենավտանգավոր էկոլոգիական սպառնալիք ներկայացնող նավաբեկություններից մեկը։ Ենթադրվում է, որ այն սկզբնապես ունեցել է մոտ 100 հազար լիտր վառելիքային նավթ։
Հուլիսի 14-24-ը իրականացված գործողության ընթացքում ջրասուզակները վառելիքը դուրս են մղել նավի բաքերից՝ հատուկ բացված անցքերի միջոցով։ Աշխատանքներին աջակցել են Ֆինլանդիայի ռազմածովային ուժերը, շրջակա միջավայրի ինստիտուտը և մի քանի մասնագիտացված նավեր։
Ծրագրի ղեկավար Թոմի Կոնտտոյի խոսքով՝ ծովային բարդ պայմանները մի քանի անգամ ընդհատել են աշխատանքները, ինչի հետևանքով գործողությունն ավարտվել է նախատեսվածից մեկ օր շուտ։ Միևնույն ժամանակ, իշխանությունները նշում են, որ կատարված աշխատանքը զգալիորեն նվազեցրել է նավաբեկությունից բխող բնապահպանական վտանգը։
Մինչ գործողության մեկնարկը մասնագետները պարզել էին, որ նավաբեկությունից կորպուսի վնասված հատվածներով րոպեում մեկից երկու կաթիլ մազութ էր արտահոսում։ Նախագիծը ֆինանսավորվում է Ֆինլանդիայի AHTI (2023–2027) ծրագրի շրջանակում, որի նպատակն է բարելավել երկրի ջրային և ծովային միջավայրի վիճակը։
1941 թվականին Ilmarinen ռազմանավի խորտակման հետևանքով զոհվել էր անձնակազմի 271 անդամ։ Իշխանությունները շեշտում են, որ նավաբեկությունը նրանց վերջին հանգրվանն է, ուստի աշխատանքների ընթացքում առանձնահատուկ ուշադրություն է դարձվել վայրի սրբության պահպանմանը։
.gif)
