Իսրայելի Երուսաղեմ քաղաքում կայանալիք տղամարդկանց շախմատի 2015 թվականի Եվրոպայի անհատական առաջնությունում Հայաստանից կմասնակցի 8 շախմատիստ: Այդ մասին տեղեկացնում է առաջնության պաշտոնական կայքը:
Առաջնությունում մեր հանրապետությունը ներկայացնելու իրավունք են ձեռք բերել Հայաստանի այս տարվա տղամարդկանց առաջնությունում առաջին հինգ տեղերը գրաված շախմատիստները: Դրանք են գրոսմայստերներ Կարեն Հ.Գրիգորյանը, Ռոբերտ Հովհաննիսյանը, Զավեն Անդրիասյանը, Սամվել Տեր-Սահակյանը եւ առաջին կարգային Արման Միքայելյանը: Մեր մյուս երեք մասնակիցների անունները կորոշվեն ավելի ուշ:
2015 թվականի Եվրոպայի անհատական առաջնությունը տեղի կունենա փետրվարի 24-ից մինչեւ մարտի 8-ը: Մրցաշարին մասնակցելու հայտ է ներկայացրել 28 երկրների 189 շախմատիստ: Առաջնությունը կանցկացվի շվեյցարական մրցակարգով, 11 տուրով:
.gif)
