Տեղի է ունեցել շախմատի մարզային ֆեդերացիայի հերթական նիստը

Մարզպետարանի նիստերի դահլիճում կայացել է Կոտայքի մարզի շախմատի ֆեդերացայի հերթական նիստը, որը վարել է ՀՀ Կոտայքի մարզպետ Ա. Հարությունյանը:

Մարզի շախմատի ֆեդերացայի նիստի աշխատանքներին մասնակցել է Հայաստանի շախմատային ֆեդերացիայի նախագահի առաջին տեղակալ Ս. Լպուտյանը:
Օրակարգի առաջին հարցի շրջանակներում մարզպետարանի աշխատակազմի կրթության, մշակույթի և սպորտի վարչության մշակույթի և սպորտի բաժնի պետ Ա. Սիմոնյանը ներկայացրել է մարզի շախմատի ֆեդերացիայի նախորդ տարվա գործունեության արդյունքների վերաբերյալ ամփոփ տեղեկատվություն, ինչպես նաև անդրադարձ կատարել շախմատի ասպարեզում արձանագրված ցուցանիշներին, մասնավորապես, Կոտայքի մարզի շախմատի հավաքական թիմի Հայաստանի առաջնությունում երկրորդ պատվավոր հորիզոնականը զբաղեցնելու հանգամանքին:

Կոտայքի մարզպետ Ա. Հարությունյանն իր խոսքում անդրադարձել է մարզում «Շախմատ» մարզաձևի զարգացման հեռանկարներին, մարզի քաղաքային և գյուղական համայնքներում շախմատային ավանդույթների կայացմանն ու կատարելագործմանը, ինչպես նաև հանրակրթական դպրոցներում «Շախմատ» առարկայի դասավանդման արդյունավետության բարձրացմանը միտված նախաձեռնություններին:

Կոտայքի մարզպետը նշել է, որ մարզաձևը մշտապես գտնվելու է մարզի ղեկավարության և մարզի շախմատային ֆեդերացիայի ամենօրյա ուշադրության կենտրոնում և արվելու է առավելագույնը մարզի շախմատային ցուցանիշներում մշտապես բարձր արդյունքներ գրանցելու գործում:

Մարզի շախմատի ֆեդերացայի նիստի շրջանակներում ամփոփիչ խոսքով ներկաներին է դիմել նաև Հայաստանի շախմատի ֆեդերացիայի նախագահի առաջին տեղակալ Ս. Լպուտյանը՝ կարևորելով մարզաձևի շարունակական զարգացումն ու մարզում շախմատի նկատմամբ նորովի հետաքրքրություններ ձևավորելու անհրաժեշտությունը:
Հայաստանի շախմատի ֆեդերացիայի նախագահի առաջին տեղակալն իր խոսքում նշել է նաև, որ առաջիկայում Կոտայքի մարզում նախատեսվում է կազմակերպել Շախմատի աշխարհի առաջնություն:

ՀՀ Կոտայքի մարզպետարանի աշխատակազմի տեղեկատվության և հասարակայնության հետ կապերի բաժին