Նախագահականո՞ւմ է որոշվել Սուրիկ Խաչատրյանի եղբորը հոգեբուժարան ուղարկել. «Ժողովուրդ»

«Ժողովուրդ» օրաթերթը գրում է. ««Ժողովուրդ»-ի տեղեկություններով՝ Սյունիքի մարզպետ Սուրիկ Խաչատրյանի եղբայրը՝ Սեյրան Խաչատրյանը, նույն ինքն՝ Աղալարը, անցած շաբաթվա վերջին տեղափոխվել է հոգեբուժարան՝ սուր պսիխոզ ախտորոշմամբ: Աղալարը փաստացի «հոսպիտալացվել» է անմիջապես այն բանից հետո, երբ հայտնի դարձավ, որ մայիսի 2-ին Գորիսի Սդղի գյոլ տարածքում տեղի ունեցած ծեծի գործով վերահսկող դատախազը հրահանգել է խստացնել Սեյրան Խաչատրյանի և նրա որդու՝ Էյներ Խաչատրյանի մեղադրանքը:

Արդյունքում, նրանց մեղադրանքը 118 հոդվածից (ծեծ) փոխվել է ՀՀ ՔՕ 113 հոդվածով՝ դիտավորությամբ առողջությանը միջին ծանրության վնաս պատճառելը: Նկատենք, որ եթե առաջին մեղադրանքի դեպքում ազատազրկումը որպես պատիժ նախատեսված չէ, ապա ներկա մեղադրանքը մինչև հինգ տարվա ազատազրկում է նախատեսում: Սակայն վերջին զարգացումները ցույց են տալիս, որ ամեն ինչ գնում է Սուրիկ Խաչատրյանի մերձավորներին պատժից ազատելու ուղղությամբ՝ ընդհուպ մինչև անմեղսունակության հիմքով: Կարծես թե նման որոշումը կայացվել է ՀՀ նախագահի նստավայրում»:

Ավելի մանրամասն՝ թերթի այսօրվա համարում։