Հայ երաժշտարվեստի պատմության մեջ առաջին անգամ հայկական Հայաստանի պետական երիտասարդական նվագախումբը պաշտոնական կարգավիճակով հանդես է գալու Եվրոպայում մեծ հեղինակություն վայելող Musica Riva միջազգային փառատոնի շրջանակներում, տեղեկացնում է նվագախմբի մամուլի ծառայությունը:
Հայաստանի պետական երիտասարդական նվագախումբը (գեղարվեստական ղեկավար և գլխավոր դիրիժոր` Սերգեյ Սմբատյան) հրավիրվել է որպես հատուկ ընտրված պաշտոնական նվագախումբ` հուլիսի 20-ից օգոստոսի 3-ն Իտալիայի Ռիվա դել Գարդա քաղաքում կայանալիք Musica Riva միջազգային 30-րդ փառատոնին:
Երիտասարդական նվագախմբի մասնակցությունը փառատոնին հնարավոր է դարձել ՀՀ մշակույթի նախարարության, Արթուր Վարժապետյանի` ,Լուդինգե ընկերության հիմնադիր նախագահ, և նվագախմբի շատ այլ ընկերների աջակցության շնորհիվ:
Փառատոնի շրջանակներում, ի թիվս այլ համերգների, Հայաստանի պետական երիտասարդական նվագախումբը կներկայացնի նաև հայկական երաժշտության երեկո։
Իտալական Musica Riva փառատոնը հիմնված է 30-ամյա պատմության և արդեն իսկ ձևավորված ինքնատիպ ավանդույթների վրա. յուրաքանչյուր տարի երկրագնդի տարբեր ծայրերից այն իր հարկի տակ է ընդունում աշխարհահռչակ նվագախմբերի, մենակատարների, պարային խմբերի, երգչախմբերի, արվեստի աշխարհի այնպիսի նշանավոր ներկայացուցիչների, ինչպիսիք են Ալդո Չիկոլինին, Էմանուել Պայուն, Ռենատո Բրուզոնը, Իսահակ Կարաբչևսկին, Գլորիա Գեյները, Ալեսանդրո Կարբոնարը, Մաուրո Մաուրը, Պլասիդո Դոմինգոն, Ջիլբերտո Ջիլը:
.gif)
