ՀՀ կառավարության այսօրվա նիստում որոշում կայացվեց գումար տրամադրել ՀՀ արդարադատության նախարարությանը՝ 2008 թվականի մարտի 1-2-ը Երեւան քաղաքում տեղի ունեցած իրադարձությունների ժամանակ տուժած անձանց աջակցության տրամադրման նպատակով: Արդարադատության նախարարությանը կհատկացվի 720 միլիոն դրամ:
ՀՀ կառավարության 08.08.2019թ. թիվ 990-Ն որոշմամբ հաստատվել է 2008 թվականի մարտի 1-2-ը Երեւան քաղաքում տեղի ունեցած իրադարձությունների ժամանակ տուժած անձանց աջակցության ձեւը եւ չափը, համաձայն որի աջակցությունը տրամադրվում է միանվագ դրամական օգնության ձեւով՝ հետեւյալ չափերով՝
1) ստացած վնասվածքի պատճառով զոհված (մահացած) անձի` Հայաստանի Հանրապետության քրեական դատավարության օրենսգրքով նախատեսված կարգով իրավահաջորդի կարգավիճակ ունեցող անձին՝ 30 միլիոն դրամ.
2) առողջությանը ծանր վնաս հասցված անձին՝ 15 միլիոն դրամ.
3) առողջությանը միջին ծանրության վնաս հասցված անձին՝ 5 միլիոն դրամ:
«Սա ոչ թե փոխհատուցում է, այլ սա աջակցություն է, ու իմ դիրքորոշումն այն է, որ հայտնի հանգամանքների բերումով մենք փոխատուցման հարցի վերաբերյալ որոշումներ պիտի կայացնենք ՄԻԵԴ-ի կողմից կայացված որոշումների հիման վրա»,- ասաց ՀՀ վարչապետ Նիկոլ Փաշինյանը:
Վարչապետի խոսքով` շատ կարեւոր է, որ այս հարցում որոշումները կայացվեն մաքսիմալ օբյեկտիվ:
«Բայց քանի որ չգիտենք` երբ կկայացվի որոշումներ ու չստացվի այնպես, որ այս պայմաններում մեր կառավարությունը որեւէ միջոց չի ձեռնարկում Մարտի 1-ի զոհերին եւ տուժաներին աջակցություն ցույց տալու համար, հիմա մենք այս որոշումը կայացնում ենք ԱԺ կողմից ընդունված օրենքի հիման վրա, իսկ թեման ամբողջությամբ կփակենք ՄԻԵԴ-ի որոշման հիման վրա»,- ասաց Փաշինյանը:
.gif)
