Արդյո՞ք ես կաշառակեր ու կոռուպցիոն դատավորներից եմ՝ ձեր նախարարի աչքերով. Վազգեն Ռշտունի

Արդեն երկրորդ նիստն է,  ինչ ՀՀ վերաքննիչ քրեական դատարանի դատավոր Վազգեն Ռշտունու ներկայացուցիչ Ռուբեն Մելիքյանը եւ Սիրանույշ Սահակյանը փորձում են արդարադատության նախարարության ներկայացուցիչներից պարզել, թե քանի՞ հոգու վերաբերյալ է նման ուսումնասիրություն կատարվել ու դրա արդյունքներով քանի՞ հոգու նկատմամբ է կարգապահական վարույթ հարուցվել»:

Սակայն հարցերը այդպես էլ մնում են անպատասխան:

Այսօրվա նիստին Ռուբեն Մելիքյանը կրկնեց հարցը՝ վերաձևակերպելով այն: Նրան հստակ հետաքրքիր էր՝ ինչո՞ւ է շարունակ դատավորների գնահատման վարկանշային աղյուսակում առաջատար Վազգեն Ռշտունին արժանացել արդարադատության նախարարի ուշադրությանը:

Բավական տևական քննարկումից հետո այդպես էլ պարզ չեղավ, թե, ի վերջո, ինչո՞ւ են ստուգումներ սկսվել հենց Վազգեն Ռշտունու առնչությամբ:

Ռուբեն Մելիքյանի հաջորդ հարցը վերաբերում էր նրան՝ արդյո՞ք Ռշտունու կողմից վերաբաշխված նշված 10 գործերի ճակատագրի վերաբերյալ Արդարադատության նախարարությունը ուսումնասիրություն կատարել է: Ի պատասխան ՀՀ արդարադատության փոխնախարար Երանուհի Թումանյանցը բերեց քրեական գործերից մեկի օրինակը, երբ տարբեր օրերի նիստեր չեն կայացել, ապա նոր այն վերաբաշխվել է:

Վազգեն Ռշտունին նկատեց՝ կան գործեր, որոնք կարող են մեկ նիստով ավարտվել, կան այնպիսիք, որոնք կարող են հետաձգվել, որովհետև, օրինակ, բերված օրինակի գործով՝ 2 ամսվա ընթացքում որևէ դատավարական գործողություն չի իրականացվել, և ի՞նքը կվարեր նիստը, թե՞ մեկ այլ դատավոր, նշանակություն չուներ:

Դատավոր Վազգեն Ռշտունու մյուս ներկայացուցչի՝ Սիրանուշ Սահակյանի հարցերը Վերաքննիչ դատարանում գործերի վերաբաշխման հետևանքով պատասխանատվության պրակտիկայի մասին էին. կա՞ նման պրակտիկա, թե՞ ոչ: Այս հարցը ևս մնաց անպատասխան :

«Արդյո՞ք ես կաշառակեր ու կոռուպցիոն դատավորներից եմ՝ ձեր նախարարի աչքերով, ու դրա համար է իմ նկատմամբ այս գործընթացը»,- դիմելով արդարադատության նախարարության ներկայացուցիչներին՝ ասաց Վազգեն Ռշտունին:

Գագիկ Ջհանգիրյանը հայտարարեց ,թե այստեղ իրավական գործընթաց է, և քաղաքական հայտարարություններ չի կարելի անել:

Նշենք, որ ՀՀ արդարադատության նախարարության կողմից կարգապահական պատասխանատվության ենթարկելու միջնորդության հիմքը Ռշտունու՝ երկարատեւ արձակուրդ մեկնելու պատճառով քրեական գործերը վերամակագրելն է։

Ք.Մ.