Բացառիկ լուսանկարներ. Արարատի մարզում ողբերգական վթարից անշնչացած հայտնաբերել են Ազատ գյուղի կացարանի հրդեհից կյանքից զրկված զինվորներից մեկի հորը . ով է նա

ArmLur.am-ի բացառիկ տեղեկությունների համաձայն՝ այսօր Արարատի մարզում ավտովթարից մահացած տղամարդը Ազատ գյուղի զինվորական կացարանի հրդեհի հետեւանքով մահացած Սերգեյ Կեվորկովի հայրն է եղել՝ Կարեն Կեվորկովը։ Նշենք, որ որդուն կացարանի հրդեհի հետևանքով կորցնելուց հետո՝ նրանք, ի հիշատակ իրենց զինվոր որդու, որոշել էին երեխա ունենալ: Վերջինիս կինը հղի է, սակայն ողբերգական վթարը խլեց նաեւ հոր կյանքը։

Shamshyan.com-ը գրել էր, որ նոյեմբերի 13-ին ողբերգական ավտովթար է տեղի ունեցել Արարատի մարզում: Ժամը 19:40-ի սահմաններում Opel Astra մակնիշի ավտոմեքենան Մասիս-Վաղարշապատ ավտոճանապարհի Սայաթ-Նովա-Միզամի գյուղերի խաչմերուկում դուրս է եկել հանդիպակաց երթևեկելի գոտի, բախվել հողաթմբերին, ապա բետոնե սյանը և մասամբ հայտնվել չգործող առվակում:

Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով վարորդը տեղում մահացել է, իսկ 1 հոգի, ում առաջինն օգնության են հասել քաղաքացիները և օպերատիվորեն ժամանած Մասիսի բժշկական կենտրոնի շտապօգնության բժիշկների հերթապահ խումբը, տեղափոխվել է «Էրեբունի» բժշկական կենտրոն:

Օպերատիվորեն դեպքի վայր են ժամանել ՀՀ Ներքին գործերի նախարարության ոստիկանության Պարեկային ծառայության Արարատի մարզի գումարտակի 1-ին վաշտի 2-րդ դասակի պարեկները՝ գումարտակի հրամանատար Գրիգոր Բաբաջանյանի, գումարտակի հրամանատարի տեղակալ Աբել Վարդանյանի և վաշտի հրամանատար Արթուր Զիրոյանի գլխավորությամբ:

Տեղում տարածքը սահմանազատել են նույն վաշտի պարեկներ Վասակ Առաքելյանը, Մհեր Մեծոյանն ու Ավթանդիլ Հակոբյանը, որպեսզի հետաքրքրասեր վարորդները ավտոմեքենաները չկայանեն և խցանում տեղի չունենա, ինչը պարեկներին հաջողվում է:

Դեպքի վայր են ժամանել ՀՀ ՆԳՆ ոստիկանության Արարատի մարզային վարչության պետ Սարիբեկ Ռուստամյանը, վարչության պետի տեղակալ Արմեն Նավասարդյանը և ոստիկանության Մասիսի բաժնի պետ Ասքանազ Դավթյանը:

Վթարի մասին ոստիկանության Մասիսի բաժնից տեղեկությունը փոխանցել են Հայաստանի Քննչական կոմիտեի Արարատի մարզային քննչական վարչության Մասիսի քննչական բաժին, որտեղից ժամանել է քննչական խումբը՝ մարզային քննչական վարչության պետ Վահե Միրզոյանի, քննչական վարչության պետի տեղակալ Ներսես Մուրադյանի, Մասիսի քննչական բաժնի պետ Սամվել Անդրեասյանի, քննչական բաժնի պետի տեղակալ Արթուր Բաբայանի ու հատկապես կարևոր գործերով ավագ քննիչ Արտակ Բադալյանի գլխավորությամբ:

Տեղում քննչական աշխատանքները ղեկավարող Ա. Բաբայանի որոշմամբ նշանակվել է քրեական վարույթ:

Ոստիկանությունն ու քննչական բաժինը պարզում են մահացած վարորդի և վիրավորի ինքնությունը:

Քննիչի հանձնարարականով ավտոմեքենան տեղափոխվում է ոստիկանության Մասիսի բաժնի պահպանվող հատուկ տարածք:

Դեպքի վայրում հավաքված մի քանի քաղաքացիներ ասում էին, որ մահացածը Ազատ գյուղում՝ ՀՀ ՊՆ զորանոցում, այս տարվա հունվարի 19-ին տեղի ունեցած առեղծվածային հրդեհի հետևանքով մահացած զինվորներից մեկի հայրն էր և հնարավոր է ավտոմեքենան վարելիս սրտի հետ կապված խնդիրներ են առաջացել:

Քնար Մանուկյան