«Թագուհուն» ազատեց, հետո էլ ինքը կազատվի

2013-ին «Ազգային համաձայնություն» կուսակցության ղեկավար Արամ Հարությունյանը հայտարարել էր, որ  շախմատային լեզվով ասած` «թագուհուն»` Տիգրան Սարգսյանին, Սերժ Սարգսյանը պաշտոնանկ կանի` իր իշխանությունը պահելու համար:

Արամ Հարությունյանի կանխատեսումը  իրականացավ,  իսկ թե ո՞վ է փոխարինելու Տիգրան Սարգսյանին,  փորձեց պարզել armlur.am-ը  Արամ Հարությունյանից:

-Պրն Հարությունյան,  սպասելի՞ էր վարչապետի հրաժարականը: Ինչո՞վ է դա պայմանավորված:

-Եթե ուշադիր եղաք, ապա  դա եղավ մինչ ապրիլի 28-ը, երբ չորս ուժերը պետք է կառավարությանն անվստահություն հայտնեին, բացի այդ` լինելու էին հանրահավաքներ, իսկ Ազատության հրապարակը  լեփ-լեցուն էր լինելու: Իշխանությունը վախենում է ավելի շատ  ժողովրդից, քան քաղաքական ուժերից: Վարչապետի հրաժարականը ցույց տվեց, որ Սերժ Սարգսյանը  գնում է զիջումների:

-Ո՞վ է լինելու հաջորդ վարչապետը, ում եք տեսնում այդ պաշտոնում:

-Եթե ՀՀԿ շտաբում է որոշվելու, ապա համոզված եմ`նոր  բրոնե ժիլետ է նշանակվելու: Ընդդիմությունը չպետք է  իր գործողությունները սրանով ավարտված համարի: Խնդիրն այն է, որ համակագային փոփոխություն է  պետք և կարևոր է որոշման ընդունման կարգը: Վարչապետի թեկնածուն չպետք է նշանակվի  ՀՀԿ շտաբում: Տիգրան Սարգսյանից էլ ինչպես Հարություն Առաքելյանն էր ասել,  ստորագրություն պետք է վերցվի քաղաքից չբացակայելու առումով: Տիգրան Սարգսյանն ամեն ինչի համար պետք է պատասխան  տա:

-Վարչապետի հավանական թեկնածուների անուններ են շրջանառվում, որոնցից  հավանական են համարում Ռոբերտ Քոչարյանին (թեև նրա մամլո խոսնակը հերքել է այդ տեղեկությունները)  ու Հովիկ Աբրահամյանին: Նրանցից ո՞րի  նշանակումն եք հավանական համարում:

-Ամեն ինչ հնարավոր է, բայց կարևոր է` որոշումն ինչպես կընդունվի: Քաղաքական մեծամասնություն գոյություն չունի, քանի որ երեք օր առաջ  կրծքով պաշտպանում էին վարչապետին, իսկ պարզվում է` նա մեկ ամիս առաջ դիմում է գրել: Դա աբսուրդ է: Այսինքն` որոշում է ընդամենը մեկ մարդ`Սերժ Սարգսյանը:

Ինչ վերաբերում է ձեր նշած մարդկանց, ապա ես չեմ ուզում որևէ մեկի քարոզով կամ հակաքարոզով զբաղվել: Քոչարյանը իր թերություններով հանդերձ ցույց  է տվել, որ նա կարող է աշխատել: Հիմա եթե որևէ մեկը նշանակվի վարչապետ, պետք է բացատրություն տրվի` ինչու նա, որովհետև, երբ այն ժամանակ  վարչապետ նշանակվեց Տիգրան Սարգսյանը, ոչ ոք չհասկացավ` ինչու նա պետք է դառնա վարչապետ:

Եթե անգամ Քոչարյանը  լինի վարչապետ, ապա   կարևոր է հասկանալ` Քոչարյանի հենարանը ով է լինելու` Սերժ Սարգսյանը, ՀՀԿ-ը, թե ժողովուրդը:Քոչարյանը որևէ մեկին պարտք չպետք է մնա և չպետք է նշանակվի Սերժ Սարգսյանի կամքով: Նա պետք է ազատ լինի որոշումներ կայացնելիս:

-Կա մեկ այլ տեսակետ` չի բացառվում, որ Սերժ Սարգսյանը կառավարություն կազմի ԱԺ չորս ոչ իշխանական ուժերի հետ: 

-Ընդունելի չի լինի, եթե  չորս ուժերի ներկայացուցիչներից յուրաքանչյուրին նախարարի պաշտոնում նշանակի, մեկին էլ վարչապետ: Նոր կառավարությունը պիտի  իր թիկունքում  զգա  ժողովրդին: Նոր վարչապետը չպետք է լինի Սերժ Սարգսյանի համար ժամանակ ձգելու միջոց և նոր թիրախ` իրենից հարվածները հեռացնելու համար:

–Որքանո՞վ է հավանական Սերժ  Սարգսյանի հրաժարականը, որն արդեն պարտադրված կլինի Մոսկվայի կողմից:

-Եվ Մոսկվայի և Արևմուտքի համար  մայդանի դեպքերով պարզ դարձավ, որ չի կարելի  հենվել թույլ իշխանության վրա: ՌԴ-ի համար ձեռնտու չէ թույլ իշխանությունը, քանի որ նա, ինչ ուզում են տալիս է, իսկ եթե մի քիչ լավ ուզող լինի, կարող է այս  իշխանությունը ուրիշին տալ: Որքան էլ մեր ժողովուրդը լինի համերատար ու իմաստուն, մազոխիստ չէ, որ հանդուրժի այս իշխանություններին:

Սոնա Դավթյան