Հայաստանի ազգային պոլիտեխնիկական համալսարանի (ՀԱՊՀ) ռեկտոր Գոռ Վարդանյանը ֆեյսբուքյան իր էջում լուսանկարներ է հրապարակել և հայտնել, որ համալսարանում մեկնարկել է պատմական ուսանողական ճաշարանի վերակառուցման ծրագիրը։
«Պատմությունը վերածում ենք ապագայի»,- գրել է Վարդանյանը։
Նրա խոսքով՝ պատմական ուսանողական ճաշարանը վերակառուցվելու է որպես ժամանակակից սննդի սրահ (Food Court), որը նախատեսված է ուսանողների, աշակերտների և համալսարանի աշխատակիցների համար։
«Սա պարզապես շենքի վերանորոգում չէ։ Սա միջավայրի փոփոխություն է, որտեղ ուսանողը, աշակերտը և համալսարանի յուրաքանչյուր աշխատակից կկարողանա ունենալ առողջ, որակյալ և հասանելի սննդի հնարավորություն»,- նշել է ՀԱՊՀ ռեկտորը։
Ծրագիրն իրականացվում է «Հայաստանի ազգային պոլիտեխնիկական համալսարան» հիմնադրամի և «Ֆիլիպ Մորիս Արմենիա» ՓԲԸ-ի համագործակցությամբ։
Նախատեսվում է, որ 2027 թվականին Պոլիտեխնիկի թիվ 13-րդ մասնաշենքի առաջին հարկում կգործի նոր, ժամանակակից և ուսանողակենտրոն սննդի սրահ։
«Հին պատերի մեջ՝ նոր մշակույթ։ Պոլիտեխնիկի պատմության մեջ՝ նոր էջ»,- գրել է Գոռ Վարդանյանը։
.gif)
