armlur.am-ի հավաստի տեղեկություններով՝ ՀՀ առողջապահության նախարարության ենթակայության տակ գտնվող Երևանի հոգեբուժարանների աշխատակիցները չեն ստացել մարտ և ապրիլ ամսվա աշխատավարձերը, ինչը հարուցել է աշխատակիցների դժգոհությունը:
Առողջապահության նախարարության պետական առողջապահական գործակալության պետ Սարո Ծատուրյանն armlur.am-ի հետ զրույցում ներկայացրեց պարզաբանում խնդրի առնչությամբ:
«Հոգեբուժական բժշկական կենտրոն միավորումը, որի կազմում էին նախկինում հոգեբուժական հիմնարկները, կառավարության որոշմամբ՝ լուծարվել է: Մարտի 14-ից հոգեբուժական հիմնարկները վերակազմակերպվել են: Այդ գործընթացը տեխնիկակապես բարդ գործընթաց է»,- մանրամասնեց առողջապահության ներկայացուցիչը` հավելելով, որ ֆինանսական խնդիրներն արդեն լուծված են. «Այսօր աշխատակիցները կստանան միանգամից երկու ամսսվա աշխատավարձ»:
-Պրն. Ծատուրյան, հնարավո՞ր չէր վերակազմակերպման գործընթացն այնպես կազմակերպել, որ աշխատակիցները ժամանակին ստանային իրենց աշխատավարձերը:
-Աշխատավարձերը վճարելու համար պետք է լինի հաշվեհամար, որպեսզի մենք կարողանանք գործարք անել, պետբյուջեից այդ գումարը փոխանցվի հաշվեհամարին, որից հետո կառույցի ղեկավարը կարողանա իր աշխատակիցներին վճարել աշխատավարձերը, իսկ դա բավական երկար ժամանակ է պահանջում:
– Իսկ հոգեբուժարանների ղեկավարները աշխատողներին նախապես զգուշացրե՞լ են աշխատավարձերի ուշացման մասին:
-Այդ հարցը պետք է ուղղեք բուժհիմնարկների տնօրեններին: Ինչքան գիտեմ` աշխատողները տեղյակ են եղել, որ լուծարվում է նախկին հիմնարկը, նոր հիմնարկ է ստեղծվում:
armlur.am-ը Նուբարաշենի հոգեբուժարանի տնօրեն Սամվել Թորոսյանից փորձեց առաջացած հարցերի առնչությամբ պարզաբանում ստանալ: Վերջինս ասաց, որ ինքը հիվանդների մոտ է և մեկ ժամից կարող է մեր հարցերի պատասխանել: Հոգեբուժարանի տնօրենը միայն ասաց, որ աշխատակիցներն այսօր կստանան իրենց աշխատավարձերը:
Սոնա Դավթյան
.gif)
