Մասնագիտական կրթության որակի ապահովման ազգային կենտրոնում այսօր հիմնադրամի աշխատակազմի, Հոգաբարձուների խորհրդի, Հավատարմագրման հանձնաժողովի և փորձագետների մասնակցությամբ քննարկվեցին կենտրոնի 2016-2020թթ. ռազմավարական ծրագրի հիմնական ուղղությունները: Հանդիպումը վարում էր ՈԱԱԿ Հոգաբարձուների խորհրդի նախագահ Վարուժան Ավետիքյանը:
Միջոցառման սկզբում ՈԱԱԿ տնօրեն Ռուբեն Թոփչյանը ներկաների ուշադրությունը հրավիրեց ներկա ռազմավարական ծրագրի հիմնական դրույթներին, ապա ներքին շահակիցների մասնակցությամբ քննարկվեց, թե անցած 5 տարիների ընթացքում հիմնադրամը որքանով է իրականացրել իր առջև դրված նպատակներն ու խնդիրները: Այնուհետև վեր հանվեցին ռազմավարական ծրագրի իրականացման ընթացքում բացահայտված խնդիրները, օրենսդրական բացերը, քննարկվեցին դրանց լուծման հնարավոր տարբերակները:
Ռազմավարական ուղղությունները որոշելիս, ի թիվս այլ հարցերի, քննարկվեցին նաև հանրային վստահության ամրապնդմանն միտված քայլերը, ինչպես նաև ՈԱԱԿ դերակատարության մեծացման հնարավորությունը ՀՀ տարածքից դուրս: ՈԱԱԿ տնօրեն Ռուբեն Թոփչյանը նշեց, որ հիմնադրամի դերակատարության մեծացումը տարածաշրջանում կբարձրացնի վստահությունը հայաստանյան բարձրագույն կրթական համակարգի նկատմամբ, ինչն էլ իր հերթին կնպաստի օտարերկրյա ուսանողների հոսքի աճին դեպի հայաստանյան բուհեր:
Առաջիկայում ՈԱԱԿ ռազմավարական ուղղությունները կքննարկվեն նաև արտաքին շահակիցների հետ, որից հետո համապատասխան աշխատանքային խմբեր կձևավորվեն`ռազմավարական ծրագիրն ամբողջացնելու համար:
.gif)
