ԻՐԵՆՔ ԻՐԵՆՑԻՑ ԱՆՉԱՓ ԳՈՀ

Հայաստանի հասարակությունը վաղուց  է  հաշտվել այն մտքի հետ, որ ՀՀ կառավարությունը տեխնիկական լոկալ հարցեր լուծող  մի կառույց է, որը ներքին  եւ արտաքին տնտեսաքաղաքական մարտահրավերներին հակազդելու որեւէ գործուն մեխանիզմ չունի:   Սակայն այդ մասին խոստովանել կարող էր միայն ներկայիս կառավարությունն` իր պաշտոնական կայքէջում զետեղած`  «Ի՞նչ տվեց Հայասատանին 2010 թվականը» խորագրով վերլուծություն- հաշվետվությունների շարքով: Այդ վերլուծություններում որեւէ խոսք չկա  2010 թ. ընթացքում Հայաստանի   շուրջ  տեղի ունեցած գլոբալ տնտեսաքաղաքական գործընթացների մասին: Չկա նաեւ արդարադատության եւ իրավապահ մարմինների աշխատանքի մասին որեւէ հիշատակում: Այս աբսուրդի երկրում, ըստ կառավարության, քաղաքականությունը, տնտեսությունը եւ արդարադատությունը ապրում են տարանջատ, որեւէ կապ չունեն միմյանց հետ, մի խոսքով` ապրում են իրարից անկախ եւ անկապ: «Ի՞նչ տվեց 2010 թվականը Հայաստանին»  խորագիրը ենթադրում էր, որ համեստ, չափազանց համեստ հաջողությունների կողքին կառավարությունը նաեւ պետք է խոստովաներ իր սխալներն ու թերացումները եւ  գոնե փորձեր  առկա վիճակի համար հիմնավորված արդարացումներ ներկայացնել: Սակայն` ոչ: Պարզվում է` եղել են միայն ձեռքբերումներ: Ինչեւէ, անդրադառնանք  ներկայացված հաջողություններին: Հաջողություն համար առաջին. Կառավարությունը հարկային արտոնություններ է սահմանել մի քանի տնտեսվարող սուբյեկտների համար, որոնք խոստացել են բացել 950 նոր աշխատատեղեր: Իսկ թե որքա՞ն աշխատատեղ է փակվել 2010 թվականի ընթացքում, այդ մասին ՀՀ կառավարությունը համեստորեն լռում է: Միայն Ամանորից առաջ գործազուրկ դարձան ՀՀ սոցապ նախարարության շուրջ 300 աշխատող: Ինչ վերաբերում է հարկային արտոնություններին, ապա գաղտնիք չէ, որ դրանք տրվում են բացառապես յուրայիններին, որոնք հետագայում խախտում են   աշխատատեղեր բացելու պարտավորությունները` դրա համար որեւէ պատասխանատվություն չկրելով: Հաջողություն համար երկրորդ. Հայաստանը եղել է լավագույնը Շանհայի բարձր տեխնոլոգիաների ցուցահանդեսում:  Կառավարությանը թվում է, թե 21-րդ դարում «Պատյոմկինյան գյուղերով»  կարելի է ինչ-որ մեկին խաբել: Լավ տաղավար ունենալը վատ  բան չէ, սակայն ավելի ցանկալի կլիներ, որ  բարձր տեխնոլոգիաների զարգացմանը հատկացված միջոցների գոնե մի մասն ուղղվեր  նրան, որ Հայաստանը ինտերնետի արագության խայտառակ ցուցանիշով ներկայումս զբաղեցրած 117-րդ  հորիզոնականից բարձրանար մի փոքր վեր:Հաջողություն համար երրորդ. Նշվում է, թե քայլեր են ձեռնարկվել նոր բիզնեսի արագ ձեւակերպման համար: Նկատենք, սակայն, որ  կառավարությունը որեւէ քայլ  չի ձեռնարկում  հեշտացնելու համար  բիզնեսի փակման գործընթացը, որն, ի դեպ,  պակաս կարեւոր  քայլ չէ  առողջ բիզնես- մթնոլորտի համար:  Գոնե կառավարությանը պետք է հայտնի լինի, թե ինչ կարգի գլխացավանք է մի սովորական ՍՊԸ լուծարելը: Կառավարությունը իր կայքէջի  ընթերցողներին  նաեւ  հիշեցնում է, որ ինքն է Հայաստան կանչել  աշխարհահռչակ տենոր Պլաչիդո Դոմինգոյին,   եւ ուրեմն` ինքն  է անուղղակիորեն  դարձել Երեւանի  նախկին քաղաքապետ Գագիկ Բեգլարյանի հրաժարականի պատճառը: Հավանաբար, կառավարությունում կարծում են, որ «Չոռնիից» ազատվելը կարելի է դասել 2010թ. ամենամեծ հաջողությունների թվին:Իսկ այնպիսի «անլուրջ» թեմաներ, ինչպիսիք են՝ Հայաստանի արտաքին պարտքի շեշտակի ավելացումը, աննախադեպ գնաճը, բիզնեսի արտահոսքը, ընդհանրապես  չեն արժանացել կառավարության ուշադրությանը: ԱՐԻՍ ՎԱՂԱՐՇԱԿՅԱՆ