Մարտի 1-ին ՀՀ սփյուռքի նախարար Հրանուշ Հակոբյանը Հայաստանի ժուռնալիստների միությունում ներկա գտնվեց «Կալիֆորնիա Կուրյեր» շաբաթաթերթի հրատարակիչ և խմբագիր Հարութ Սասունյանին Հայաստանի ժուռնալիստների միության «Ոսկե գրիչ» մրցանակի հանձնման արարողությանը:
Ինչպես իր խոսքում նշեց ժուռնալիստների միության նախագահ Աստղիկ Գևորգյանը, Հարութ Սասունյանն այդ պարգևին արժանացել է լրագրողական բարձր արհեստավարժության և իր խմբագրած «Կալիֆորնիա կուրյեր» թերթում հայությանը հուզող հարցերի շուրջ խմբագրական բազմաբովանդակ հոդվածների հրապարակման համար:
Ողջունելով և շնորհավորելով Հարութ Սասունյանին պարգևի համար՝ նախարար Հրանուշ Հակոբյանն ընդգծեց. «Արժանի պարգևը զարդարում է արժանի մարդու կուրծքը: Հարութ Սասունյանը 33 տարի շարունակ իր սուր, անվրեպ խոսքով մշտապես արթնացնում է ընթերցողական շրջանակների հետաքրքրությունը: Մասնավորապես, երբ հարցը վերաբերում է Հայոց ցեղասպանությանը, հայ-թուրքական հարաբերություններին, Հայ դատի արծարծմանը նրա գրիչը դառնում է սառը զենք՝ լարվածության մեջ պահելով թուրք հասարակությանը…»: Նախարարն անդրադարձավ նաև «Լինսի» հիմնադրամում Սասունյանի աշխատանքին, ինչը վկայում էր մեծ հայրենասեր Քըրք Քըրքորյանի վստահության մասին և շեշտեց, որ «Լինիսի» հիմնադրամի շնորհիվ Հայաստանում զգալիորեն առաջ մղվեց դպրոցաշինության, ճանապարհաշինության, մշակութային օջախների վերանորոգման շատ կարևոր աշխատանքները:
Հարութ Սասունյան խմբագրի, հայի և ազգային գործչի մասին խոսեցին գրող-հրապարակախոս Գրիգոր Ջանիկյանը, «Ազգ» շաբաթաթերթի գլխավոր խմբագիր Հակոբ Ավետիքյանը, ԵՊՀ ժուռնալիստիկայի ֆակուլտետի դեկան Նաղաշ Մարտիրոսյանը, «Արմենպրես» լրատվական գործակալության տնօրեն Արամ Անանյանը և ուրիշներ:
Միջոցառման ավարտին շնորհակալական խոսքով հանդես եկավ Հարութ Սասունյանը՝ վստահեցնելով, որ հետայսու ևս ջանք չի խնայի իր լրագրողական գործունեությամբ նպաստելու հայությանը հուզող խնդիրների արծարծմանն ու միջազգայնացմանը:
.gif)
