Շատ կարգին տղա է եղել ինքը. Սիսիանի համայնքապետը՝ հրդեհից կյանքից զրկված Արթուր Գրիգորյանի մասին

Փետրվարի 6-ին՝ ժամը 13:20-ի սահմաններում, ՊՆ N զորամասի պահպանության տեղամասի մարտական դիրքի կացարանին կից տեղադրված տնակում դեռևս չպարզված հանգամանքներում բռնկված հրդեհի հետևանքով մահացել է պահեստազորային Արթուր Վարուժանի Գրիգորյանը (ծնված 1985 թ.):

ArmLur.am-ի տեղեկություններով զոհված պահեստազորայինը Սիսիանի բնակիչ էր:

«Նորմալ ընտանիքից, սոցիալապես միջին կարգի ապրող մարդիկ են, աշխատող տղա էր: Ամուսնացած չէր: Իմ հասակակիցն էր, անձամբ շփվել եմ իր հետ երկար տարիներ մինչև վերջերս նույնիսկ, ոչ ոք չի կարող ինչ-որ վատ բան ասել իր մասին, շատ կարգին տղա է եղել ինքը»- մեզ հետ զրույցում ասաց Սիսիան համայնքի ղեկավար Արմեն Հակոբջանյանը:

Արմեն Հակոբջանյանի խոսքով՝  Արթուր Գրիգորյանը սովորել է Սիսիանի 2-րդ դպրոցում, ավարտել է 10-ամյա դպրոցը: Մասնագիտություն չի ունեցել, աշխատել է՝ որպես շինարար:

Համայնքապետի խոսքով՝ դեպքի մասին առհասարակ ոչ մի տեղեկություն չկա, գիտեն այն, ինչ բոլորը՝ զորամասի մեջ այրվել է, թե ինչ պայմաններում, նախաքննությունը կպարզի:

Հիշեցնենք, որ ArmLur.am-ը քիչ առաջ դեպքից մանրամասներ էր հայտնել։

Էմմա Մարտիրոսյան