ԻՇԽԱՆՈՒԹՅԱՆ ԳՈՐԾՈՂՈՒԹՅՈՒՆՆԵՐԸ ԴԱՏԱՊԱՐՏՈՂ ԿՈՉ

Նիկոլ Փաշինյանը եւ նրան սպասարկող խորհրդարանական մեծամասնությունը կորցրել են քաղաքական լեգիտիմությունը եւ պետք է անհապաղ հրաժարական տան։ Նրանց հետագա գործունեությունը միայն խորացնում է քաղաքացիական դիմակայությունը երկրի ներսում եւ վարկաբեկում Հայաստանի հեղինակությունն ու ճանաչումը միջազգային հարաբերություններում։

Նիկոլ Փաշինյանը եւ նրա քաղաքական թիմը կրում են քաղաքական, բարոյական եւ քրեաիրավական անմիջական պատասխանատվություն վերջին օրերի իրադարձությունների համար՝ ըստ էության վերածվելով հակաժողովրդական եւ ապազգային քաղաքական տարրերի, որոնք սպասարկում են արտաքին ուժերի, առաջին հերթին՝ Թուրքիայի եւ Ադրբեջանի շահերը։
Ակնհայտ է, որ մեր ժողովրդի պատմության վերջին շրջանի բոլոր ողբերգական իրադարձություններն ուղղակիորեն առնչվում են Նիկոլ Փաշինյանի եւ նրա մերձավոր շրջապատի գործունեության հետ (2008թ. մարտի 1, 2018թ. իշխանության զավթում, 44-օրյա պատերազմ, Ադրբեջանի կողմից Հայաստանի ինքնիշխան տարածքի օկուպացիա, Լեռնային Ղարաբաղի կորուստ): Եկել է ժամանակը դադարեցնել այս ընթացքը եւ շարունակել մեր արժանապատիվ ընթացքը առանց Նիկոլի ու նրա մեծամասնության։ Սա արդեն մեր ժողովրդի համար դարձել է գոյաբանական անհրաժեշտություն։
Փաստերը վկայում են, որ անցած վեց տարիներին երկրում ձեւավորվել է Նիկոլ Փաշինյանի միանձնյա կառավարման ռեժիմ։ Այն որեւէ կապ չունի Սահմանադրության հիմնարար նորմերի, մարդու իրավունքների եւ ժողովրդավարության հետ։ Իրենց մեծամասնություն անվանող մարդկանց մի փոքր խումբ, պատերազմի նոր սպառնալիքներով շանտաժի ենթարկելով հասարակությանը, պատանդ է պահում հայկական պետությունը՝ հանուն սեփական անվտանգության եւ հարստացման։
Ռեժիմի առաջնորդ Նիկոլ Փաշինյանի խոստովանությունները վկայում են, որ վերջին վեց տարիներին նա շահարկում է հասարակական կարծիքը, մոլորության մեջ գցում բնակչությունը, ծառայում է այլ շահերի, ամրապնդում իր ընտանիքի եւ մերձավորների նյութական բարեկեցությունը։
Կառավարման վեց տարիներին նա ավելացրել է երկրի պետական պարտքը վեց միլիարդ դոլարով, աճել է կոռուպցիան, ոչնչացվել է պետության ողջ պաշտպանական համակարգը։ Իշխողների քաղաքականությունն ու գործողությունները հակասում են Հայաստանի Սահմանադրությանը եւ սպառնում են սահմանադրական կարգին։
Իշխանությունների ագրեսիվությունը, խաղաղ ցուցարարների նկատմամբ բռնի ուժի կիրառումը, Ազգային ժողովը ռազմականացված օբյեկտի վերածելը հոգեվարքի եւ իրենց կատարած հանցագործությունների համար անձնական քրեական պատասխանատվության պահը հնարավորինս հետաձգելու ցանկության դրսեւորում է։
Այսօր Հայաստանը վերածվել է ոստիկանական պետության, որտեղ իրավապահ մարմինները ոչ թե հասարակական կարգը պահպանելու եւ մարդու հիմնարար իրավունքներն ու ազատությունները հարգելու գործառույթ են իրականացնում, այլ միայն պաշտպանում են ռեժիմի առաջնորդին եւ նրա մերձավոր շրջապատին։ Այն, որ ոստիկանությունը չի ծառայում հասարակությանը, վկայում է տարեցտարի երկրում ծանր եւ առանձնապես ծանր հանցագործությունների թվի աճը։ Դատական եւ իրավական համակարգը դարձել է քաղաքական ռեժիմի կցորդը եւ ամբողջությամբ կորցրել է իր անկախությունն ու օբյեկտիվությունը։
2024 թվականի հունիսի 12-ին Բաղրամյան պողոտայում տեղի ունեցած իրադարձությունների կապակցությամբ մարդու իրավունքների պաշտպանը, Բարձրագույն դատական խորհրդի նախագահը եւ գլխավոր դատախազը պետք է անհապաղ հրաժարական տան՝ որպես սահմանադրական մարմինների ներկայացուցիչներ, որոնք չեն կարողացել կանխել մարդու իրավունքների զանգվածային խախտումները, չեն ապահովել օրենքի գերակայություն։
Հունիսի 12-ի Բաղրամյան պողոտայի դեպքերը այն կարմիր գիծն էին, որ գործող իշխանություններին դրեց օրենքից դուրս։ Մենք գտնում ենք, որ բոլոր ապօրինի գործողություն իարականացնող ոստիկանները, քննիչները, դատախազներն ու դատավորները անձնական պատասխանատվություն են կրում իրենց գործողությունների եւ որոշումների համար։ Նրանք դիտվելու են որպես Փաշինյանի հակաժողովրդական եւ հակապետական ռեժիմին աջակցողներ, խաղաղ ցուցարարների նկատմամբ իշխանությունների վայրագ, հակաօրինական գործողությունները արդարացնող։
Բոլոր քաղաքական ուժերին եւ հասարակական կազմակերպություններին, որոնք իրենց համարում են ժամանակակից հայ հանրության մաս եւ պատրաստ են պայքարել ազատության ու արդարության համար, պետք է իրենց հստակ վերաբերմունքը արտահայտեն հունիսի 12-ի իրադարձությունների կապակցությամբ։ Հակառակ դեպքում, մենք գտնում ենք, որ նրանք հավասարապես պատասխանատվություն են կրում Փաշինյանի վարչակարգի քաղաքականության համար, համերաշխ են նրա հետ եւ իրենց գործողություններով ամրապնդում են այն։
Կոչ ենք անում
1. Միջազգային հանրությանը՝ դատապարտել իշխանությունների գործողությունները։ Հակառակ դեպքում՝ ակնհայտ կլինեն երկակի ստանդարտները առ այն, որ մարդու իրավունքների, ժողովրդավարության եւ օրենքի գերակայության հարցերում միջազգային հանրության հետ համագործակցության օրակարգը սպառել է իրեն եւ կրում է բացառապես աշխարհաքաղաքական նպատակահարմարության բնույթ՝ սպասարկելով Փաշինյանի ռեժիմի շահերը։
Կոչ ենք անում ԵԽԽՎ-ին հունիսյան նստաշրջանի օրակարգից հանել Հայաստանի կողմից ստանձնած պարտավորությունների կատարման հարցը, քանի որ նախապատրաստված նյութերն օբյեկտիվ չեն, չեն արտացոլում մարդու իրավունքների եւ ժողովրդավարության որակի իրական վիճակը երկրում եւ էապես խրախուսում են Նիկոլ Փաշինյանի ավտորիտար ռեժիմի ամրապնդումը։ Եվրախորհրդի հետագա կողմնակալ վերաբերմունքը Հայաստանում մարդու իրավունքների, ժողովրդավարության եւ օրենքի գերակայության իրական վիճակին, ընդդիմության եւ քաղաքացիական հասարակության կարծիքների անտեսումը կվարկաբեկի այս կազմակերպության հեղինակությունն ու նշանակությունը։
2. Հաշվի առնելով, որ գործող իշխանությունների օրոք անհնար է հասնել իրավապահ մարմինների ղեկավարների գործունեության օբյեկտիվ եւ արդարացի իրավական գնահատականի (ներքին գործերի նախարար, ոստիկանապետ, ԱԱԾ տնօրեն, քննչական կոմիտեների ղեկավարներ), առաջարկում ենք նրանց ինքնակամ հրաժարական տալ։
Այս կոչին չհետեւելը հետագայում դիտվելու է որպես ձեր գործողությունները ծանրացնող հանգամանք, քանի որ պաշտոնավարման շարունակությունը ընկալվելու է որպես ապօրինի եւ հակաօրինական գործողությունները շարունակելու գիտակցված ցանկություն։
3. ՀՀ արժանապատիվ քաղաքացիներին՝ աջակել Սրբազան շարժմանը, կանգնել այն մարդկանց կողքին, ովքեր ցանկանում են սրանց հեռացմամբ թեւակոխել կայուն խաղաղության եւ ամուր պետության ժամանակաշրջան։
ՀՀ ԱԺ «Հայաստան» խմբակցություն
ՀՀ ԱԺ «Պատիվ ունեմ» խմբակցություն
13 հունիսի, 2024թ.

ՀՅԴ ԱՆԴԱՄՆԵՐԻ ԵՆ ԲԵՐՄԱՆ ԵՆԹԱՐԿԵԼ
Իշխանությունները գործադրության մեջ են դրել հանրությանը վախի, ահաբեկման եւ բռնաճնշումների ողջ արսենալը: Այս մասին իր ֆեյսբուքյան էջում գրել է ԱԺ «Հայաստան» խմբակցության պատգամավոր Լիլիթ Գալստյանը։

«Այսօր առավոտից (խմբ) խուզարկություններ են կատարվում Դաշնակցության Վայքի եւ Եղեգնաձորի գրասենյակներում: Բերման են ենթարկվել Վայոց Ձորի կառույցի ղեկավար մարմնի անդամներ:
Խուճապի մեջ հայտնված ռեժիմը սեփական իշխանությունը պահելու համար, կանգ չի առնում ոչնչի առջեւ:
Կատարվածը Կուսակցությունների մասին սահմանադրական օրենքի կոպիտ խախտում է: Սա ակնհայտորեն քաղաքական ուժի՝ Դաշնակցության նկատմամբ կազմակերպված եւ ուղորդվող եւ թիրախավորված հարձակում է, մեր գործունեությունը խոչընդոտելու ծրագիր:
Հայրենիքի ու պետականության համար պայքարող քաղաքական ուժին, գաղափարական մարդուն բռնաճնշումներով ու հալածանքներով չեք լռեցնի: Չե՛ք հաջողելու», – գրել է նա։

«ԼՈՒԼՈՒՆ» ԲԱՐՈՅԱԿԱՆՈՒԹՅԱՆ ԴԱՍԵՐ Է ՏԱԼԻՍ
ՔՊ-ական պատգամավոր Լուսինե Բադալյանը, նույն ինքը՝ Լուլուն, բարոյական դասեր է տալիս ընդդիմադիրներին՝ թե ատելության խոսք են տարածում եւ ուշ ժամի ակցիաներ են իրականացնում՝ խանգարելով քաղաքացիների անդորրը:
Նա օրեր առաջ ընդդիմության հանրահավաքից հետո գրել էր. «Խնդրում եմ փոխանցեք Գալստանյանին, որ ժամը 00:25 րոպե այն տարածքում, որտեղ բղավում են , իրենց իսկ հայրենակիցների երեխաներն են քնած , հիվանդ մարդիկ կան , անքնությամբ տառապող տարեց մարդիկ, ու անվերջ կարելի է թվարկել, թե ում անդորրն են խանգարում, ինչն անթույլատրելի է: Այն, որ խախտում են օրենքներ, արդեն սովորել ենք, բայց վերը նշածս մարդիկ, որոնք անդադար բողոքում են, մեղավոր չեն, որ դուք ամեն ինչ անում եք, որ բերման ենթարկվեք, մի կերպ ճողոպրեք ձեր իսկ ստեղծած ծուղակից»։
Թերեւս կարիք կա թարմացնելու նրա հիշողությունը:
Ուշագրավ է, որ հանդուրժողականության վերաբերյալ խրատներ է տալիս մի ուժի ներկայացուցիչ, որն իշխանության է եկել դագաղներով, սեւ լենտերով, ընդդիմադիրների ընտանիքներին թիրախավորելով, նրանց տուն ծաղկեպսակներ տանելով։
Հետաքրքիր է՝ նույն Լուսինե Բադալյանը 2018-ին չէ՞ր մտահոգվում քաղաքացիների մասին, երբ իրենց թիմակիցները կաթսաներով ու շերեփներով, սուլոցներով գիշերով աղմուկ էին բարձրացնում:
Եւս մեկ անգամ փաստենք՝ այն ինչ կարելի է եւ բարոյական է ՔՊ-ականներին եւ նրանց կողմնակիցներին, մյուսների համար անթույլատրելի է եւ ոչ բարոյական:

ՀՌՈՄԻ ՊԱՊԻ ՀԵՏ ՔՆՆԱՐԿԵԼ Է ՀԱՅ ԲԱՆՏԱՐԿՅԱԼՆԵՐԻ ՀԱՐՑԸ
Կիլիկիո կաթողիկոս Արամ Առաջինը եւ Հռոմի Պապ Ֆրանցիսկոս Առաջինը չորեքշաբթի օրը՝ հունիսի 12-ին, Հռոմի Սուրբ Աթոռում կայացած հանդիպմանը քննարկել են բռնի տեղահանված հայ բնակչության՝ ԼՂ վերադարձի եւ ադրբեջանական գերությունից հայ բանտարկյալների ազատման հարցը։ Այդ մասին հայտնել է Կիլիկիո կաթողիկոսությունը։
Նրանք խոսել են նաեւ Վատիկանի Երրորդ ժողով հրավիրելու հրամայականի մասին՝ ոչ կաթոլիկ եկեղեցիների ակտիվ մասնակցությամբ։ Օրակարգում է եղել նաեւ միջեկեղեցական հարաբերություններն ավելի խթանելու անհրաժեշտությունը։
Արամ Առաջինը հրավիրվել էր Հռոմ՝ դասախոսություն կարդալու կրոնի եւ աշխարհաքաղաքականության եւ Մերձավոր Արեւելքում նրանց փոխձեւավորման մասին։