ԱՄՆ Կոնգրեսում նախաձեռնվել է Ռուսաստանի դեմ նոր խիստ պատժամիջոցների օրինագիծ

ԱՄՆ Կոնգրեսի Ներկայացուցիչների պալատի դեմոկրատ անդամ Գրեգորի Միքսը նախաձեռնել է Ռուսաստանի դեմ պատժամիջոցների խստացման մասին օրինագծի քննարկում՝ շրջանցելով պալատի ղեկավարությանը:

ԱՄՆ Կոնգրեսի Ներկայացուցիչների պալատի դեմոկրատ անդամ Գրեգորի Միքսը ներկայացրել է «ազատման միջնորդություն»՝ իր հեղինակած Ռուսաստանի դեմ պատժամիջոցների խստացման մասին օրինագիծը քննարկման դնելու համար՝ առանց պալատի ղեկավարության համաձայնության։ Այս մասին նշված է Ներկայացուցիչների պալատի արտաքին հարաբերությունների հանձնաժողովի կայքում հրապարակված հայտարարության մեջ։

Ավելի վաղ, ապրիլի կեսերին, Reuters գործակալությունը հայտնել էր, որ դեմոկրատները ներկայացրել են օրինագիծ, որը նախատեսում է Ռուսաստանի դեմ ավելի խիստ պատժամիջոցներ։ Օրինագիծը ներկայացրել է Գրեգորի Միքսը, ով կարևոր պաշտոն է զբաղեցնում արտաքին հարաբերությունների հանձնաժողովում։

«Քանի որ Սենատի հանրապետական առաջնորդ Ջոն Թյունը և Ներկայացուցիչների պալատի խոսնակ Մայք Ջոնսոնը հրաժարվել են գործել, ես ներկայացրել եմ ազատման միջնորդություն՝ կապված իմ օրինագծի հետ», – նշված է Միքսի հայտարարության մեջ։

Նրա խոսքով, իր օրինագիծը «ավելի խիստ պատժամիջոցներ է նախատեսում Ռուսաստանի համար և ավելի օգտակար է Ուկրաինայի համար», քան մյուս նմանատիպ օրինագծերը, որոնք ներկայացրել են իր գործընկերները։

Եթե Ներկայացուցիչների պալատի 218 անդամ ստորագրեն այս միջնորդությունը, օրինագիծը կարող է դրվել քվեարկության, նույնիսկ եթե պալատի ղեկավարությունը դեմ է։

Ռուսաստանում բազմիցս հայտարարել են, որ երկիրը կարողանում է դիմակայել Արևմուտքի կողմից վերջին տարիներին կիրառվող և շարունակաբար խստացվող պատժամիջոցներին։ Մոսկվայում ընդգծում են, որ Արևմուտքը չունի քաջություն ընդունելու Ռուսաստանի դեմ պատժամիջոցների ձախողումը։ Արևմտյան երկրներում նույնպես հաճախ են հնչում կարծիքներ, որ հակառուսական պատժամիջոցները արդյունավետ չեն։

ՌԴ նախագահ Վլադիմիր Պուտինը ավելի վաղ հայտարարել էր, որ Ռուսաստանի զսպման և թուլացման քաղաքականությունը Արևմուտքի երկարաժամկետ ռազմավարությունն է, իսկ պատժամիջոցները լուրջ հարված են հասցրել ամբողջ համաշխարհային տնտեսությանը։ Նրա խոսքով, Արևմուտքի հիմնական նպատակը միլիոնավոր մարդկանց կյանքի վատթարացումն է։

Անի Վարդանյան