Եղիշե Մելիքյանը՝ Հայաստանի ազգային հավաքականի գլխավոր մարզիչ

46-ամյա մասնագետի թեկնածությունն այսօր արժանացավ ՀՖՖ գործադիր կոմիտեի անդամների հավանությանը:

Եշիշե Մելիքյանի հետ պայմանագիրը կգործի մինչև 2026 թ. նոյեմբեր:

Խոսելով իր նշանակման մասին՝ Եղիշե Մելիքյանն ասել է.

«Հպարտ եմ Հայաստանի ազգային հավաքականի գլխավոր մարզչի պաշտոնը ստանձնելու կապակցությամբ: Գիտակցում եմ պահի բարդությունն ու ողջ պատասխանատվությունը, բայց պատրաստ եմ պատվով անցնել այս ճանապարհը: Իմ բոլոր որոշումները կայացնելու եմ ի շահ ազգային հավաքականի և հայկական ֆուտբոլի: Այս պահին ժամանակն է համատեղելու ուժերը: Ես կոչ եմ անում ֆուտբոլային ամբողջ հանրությանը համախմբվել ազգային հավաքականի շուրջ»:

ՀՖՖ նախագահ Արմեն Մելիքբեկյանը, անդրադառնալով Եղիշե Մելիքյանի նշանակմանը, նշել է.

«Հայաստանի ֆուտբոլի ֆեդերացիան որոշել է փոխել Հայաստանի ազգային հավաքականի զարգացման ուղղությունը: Մենք շնորհակալ ենք Ջոն վան’ տ Սխիպին իր կատարած աշխատանքի համար: Այժմ հավաքականի ղեկը վստահում ենք հայաստանցի մասնագետի, ով շատ լավ է ճանաչում հայկական ֆուտբոլը ներսից, քանի որ անցել է երկար ճանապարհ՝ Հայաստանի ազգային հավաքականի ֆուտբոլիստից մինչև վերջին տարիներին հայկական ակումբային ֆուտբոլում կրկնակի չեմպիոնություն նվաճած մարզիչ:

Լիահույս ենք, որ ՀՖՖ աշխատակազմի և Եղիշե Մելիքյանի համագործակցության և ամենօրյա քրտնաջան աշխատանքի շնորհիվ Հայաստանի ազգային հավաքականը կկարողանա հասնել լավ արդյունքների: Կարծում եմ, որ համախմբման և միասնականության շնորհիվ մենք կկարողանանք քայլ առաջ կատարել»:

Հիշեցնենք, որ «Ժողովուրդ» օրաթերթը գրել էր. «Շուրջ մեկ շաբաթ է` ֆուտբոլային աշխարհի մեր աղբյուրները պնդում են, որ ՀՖՖ-ում որոշել են լուծել Հայաստանի ազգային հավաքականի գլխավոր մարզիչ Ջոն վան ‘տ Սխիպի հետ պայմանագիրը և նոր մարզիչ նշանակել «Փյունիկ»-ի ներկա գլխավոր մարզիչ Եղիշե Մելիքյանին:

Մելիքյանն իհարկե ընդունելի և արդյունք ցույց տված մարդ է հայկական ֆուտբոլում և աչքի է ընկել նաև ՀՖՖ ներկա ղեկավարության հետ բացահայտ կոնֆլիկտներով, օրինակ` հարցազրույցներից մեկում Մելիքյանը նույնիսկ անվանել էր ՀՖՖ փոխնախագահ Արմեն Նիկողոսյանին կրիմինալ սերիալներից մեկի հերոսի` Ռուդոլֆի հետ:

Ինչևէ` Մելիքյանի հնարավոր նշանակումը սեպտեմբերին կայանալիք Հայաստան-Պորտուգալիա խաղից առաջ կարող է հույս ներշնչել երկրպագուների շրջանում, սակայն միևնույն ժամանակ շատ վտանգավոր է հենց Մելիքյանի ֆուտբոլային հեղինակության համար, քանզի դժվար կլինի այս կարճ ժամանակահատվածում խելքի բերել հավաքականը ու պայքարել Աշխարհի առաջնության եզրափակիչ փուլ դուրս գալու համար:

Ֆուտբոլին մոտ կանգնած ArmLur.am-ի աղբյուրները մտավախություն հայտնեցին, որ ՀՖՖ-ն կարող է Եղիշե Մելիքյանին նշանակել հավաքականի մարզիչ և հնարավոր ձախողման դեպքում մեղքը բարդել նրա վրա` այնինչ, ինչպես նշեցին մեր աղբյուրները` Մելիքբեկյանի գլխավորությամբ ՀՖՖ-ն այս տարիների ընթացքում աչքի է ընկել ձախողումների շարքով, տարբեր տարիքային հավաքականների խայտառակ արդյունքներով, ինչը նշանակում է, որ ֆուտբոլում հնարավոր չէ արդյունք գրանցել, քանի դեռ այս մարդիկ են նստած ֆեդերացիայում։

Երևանի «Փյունիկը» չկարողացավ հաղթահարել հունգարական «Դյորի» արգելքը Կոնֆերենցիաների լիգայի որակավորման երկրորդ փուլում: Եղիշե Մելիքյանի գլխավորած թիմը պատասխան խաղում 1:3 հաշվով պարտություն կրեց»։