Սիրիայի նախագահը հայտարարել է, որ ցանկանում է խուսափել Իսրայելի հետ պատերազմից

Սեպ 23,2025 09:40

ՀԵՏԵՎԵՔ ՄԵԶ Telegram-ՈՒՄ

Սիրիան ձգտում է պահպանել «հանգիստ» հարաբերություններ բոլոր երկրների հետ և հույս ունի բանակցությունների միջոցով անվտանգության համաձայնագրի հասնել Իսրայելի հետ։ Այս մասին հայտարարել է Սիրիայի անցումային նախագահ Ահմեդ ալ-Շարաան Նյու Յորքում ՄԱԿ-ի Գլխավոր ասամբլեայի 80-րդ նստաշրջանի շրջանակներում ԱՄՆ Կենտրոնական հետախուզական գործակալության (ԿՀՎ) նախկին տնօրեն Դեյվիդ Պետրեուսի հետ զրույցում։

«Իսրայելը բազմաթիվ հարձակումներ է իրականացրել Սիրիայի վրա, շարունակում է օկուպացնել Գոլանի բարձունքները և ամեն օր ներխուժում է նրա տարածք: Այնուամենայնիվ, մենք ցանկանում ենք խուսափել Իսրայելի հետ պատերազմից, քանի որ մեր երկրին խաղաղություն է պետք իր կառուցման գործընթացը շարունակելու համար»,- ասել է նա:

Նրա խոսքով՝ հրեական պետության հետ բանակցությունները «կբացահայտեն, թե արդյոք Իսրայելն իսկապես մտահոգված է անվտանգության հարցերով, թե՞ պարզապես հետապնդում է էքսպանսիոնիստական հավակնություններ»։

«Եթե իսրայելական կողմը պարտավորվի պահպանել ձեռք բերված համաձայնությունները, ապա խաղաղության երկխոսությունը կարող է առաջ շարժվել», – հայտարարել է ալ-Շարաան։ «Բայց ամեն դեպքում Իսրայելը պետք է դուրս գա Սիրիայի տարածքից»։

Սեպտեմբերի 17-ին Սիրիայի արտաքին գործերի և արտագաղթյալների հարցերով նախարար Ասաադ ալ-Շեյբանին և Իսրայելի ռազմավարական պլանավորման նախարար Ռոն Դերմերը Լոնդոնում բանակցություններ են վարել ԱՄՆ-ի հովանու ներքո։ Կողմերը քննարկել են անվտանգության նոր համաձայնագրի նախագիծ, որը կփոխարինի Գոլանի բարձունքներում իսրայելական և սիրիական ուժերի դուրսբերման վերաբերյալ 1974 թվականի համաձայնագրին։

Ինչպես նախկինում նշել էր ալ-Շարաան, Իսրայելի հետ խաղաղության հաստատման և հարաբերությունների կարգավորման հարցը «ներկայումս օրակարգում չէ»։ Սակայն նա հավելել է, որ եթե երկու հարևան երկրներին հաջողվի համաձայնության գալ անվտանգության կարգավորումների շուրջ, ապա հնարավոր է «նրանք ապագայում այլ համաձայնությունների հասնեն»։