Երեկ ռուս լրագրող Դմիտրի Կիսելյովի և հայ պատգամավորների միջև հանդիպումը բավական թեժ էր անցել: Ռուս լրագրողը քննադատել էր, որ այժմ Հայաստանում ռուսաց լեզվի վիճակն այնքան էլ բարձր մակարդակի վրա չի գտնվում:
Այսօր խորհրդարանում, անդրադառնալով Կիսելյովի դիտարկումներին, ՀՀԿ խմբակցության պատգամավոր Կարինե Աճեմյանը, ով նաև մասնակցում էր այդ հանդիպմանը` նշեց, որ Հայաստանի քաղաքացիները, ելնելով այն տարածաշրջանից, որտեղ գտնվում են, պետք է անպայման տիրապետեն ռուսերեն լեզվին:
Լրագրողների այն դիտարկմանը, թե ինչու պատգամավորները համարժեք պատասխան չտվեցին Կիսելյովին, նա նշեց. «Պատգամավորական ակումբն այն հարթակը չէ, որտեղ պետք է միմյանց հակադարձեինք, տիկին Նաղդալյանը հակադարձեց, որ տաքսու վարորդի ռուսերեն չիմանալը ոչինչ չի նշանակում: Դա այդ հարթակը չէր, որտեղ թուր-թվանքն առած պետք է հակադարձեինք»,-նշեց նա:
Իսկ այն դիտարկմանը, թե ինչու են ռուսները բարձր դիրքից խոսում, նա նշեց. «Որովհետև Ռուսաստանը շատ մեծ երկիր է, Հայաստանը շատ փոքր է, Ուկրաինայի պես պետությունն այսօր կախում ունի թե՛ Եվրոպայից, թե՛ Ռուսաստանից: Երբ մենք ունենք Ղարաբաղի խնդիր, սահմանային լարվածություն, ուրեմն մենք պետք է խուսափենք սուր անկյուններից»,- ընդգծեց նա:
Նրա կարծիքով` ռուսների կրքերը բորբոքված են Ուկրաինայի դեպքերից հետո, և նրանք շատ ցավոտ են ընդունում տարբեր հարթակներում բոլոր դիրքորոշումները: Նա նաև կոչ արեց այդքան ծանր չտանել Կիսելյովի արտահայտությունները:
Հիշեցնենք, որ այսօր խորհրդարանում Կիսելյովի դիտարկումներին անդրադարձան նաև այլ պատգամավորներ, ովքեր քննադատեցին նրա հայտարարությունները:
.gif)
