«Բարգավաճ Հայաստան» խմբակցության պատգամավոր Վահան Բաբայանն այսօր ԲՀԿ կենտրոնական գրասենյակում ընթացող խմբակցության աշխատանքային նիստից դուրս գալուց հետո լրագրողներին հայտնել է, որ կուսակցությունն Ազգային ժողովի նախագահ Գալուստ Սահակյանից նամակ է ստացել՝ ԲՀԿ կուսակցության ղեկավար Գագիկ Ծառուկյանի բացակայությունների վերաբերյալ:
Իմանալու համար` ինչ բովանդակությամբ նամակ է ուղղվել ԲՀԿ-ին Armlur.am-ը կապ հաստատեց ԱԺ հասարակայնության հետ կապերի և լրատվության բաժնի պատասխանատու Արսեն Բաբայանի հետ, ով պարզաբանեց, որ այս պահին գործը դեռևս ուսումնասիրությունների փուլում է, իսկ ԲՀԿ-ին ուղղված նամակը կարող է լինել այդ փուլի մի մաս: Արսեն Բաբայանի խոսքով` կատարվող ուսումնասիրությունների ցանկացած արդյունք կհրապարակվի: «Այս պահին ասվածից բացի այլ մանրամասներ հայտնել չենք կարող: Կատարվում են մի շարք աշխատանքներ և ուսումնասիրություններ: Նամակը կարող է ուսումնասիրությունների մի մաս լինել»,- ասաց Արսեն Բաբայանը:
Մեր ճշտող հարցին` այսպիսով որևէ նամակ ԲՀԿ-ին ուղարկվե՞լ է, թե՞ ոչ, Արսեն Բաբայանը պատասխանեց. «Կրկնում եմ` նամակը կարող է լինել ուսումնասիրությունների մի մաս լինել: Ուսումնասիրությունների մաս կարող են լինել մի շարք այլ բաղադրիչներ ևս»:
Հ.Գ. Այսպես էլ անհասկանալի մնաց` ինչպիսի բովանդակության նամակ է ստացել ԲՀԿ-ն, և ընդհանրապես` ստացել է, թե ոչ:
.gif)
