ԱԺ ՀՀԿ խմբակցության ղեկավար Գալուստ Սահակյանը «Ժողովուրդ»-ի հետ զրույցում հայտարարեց, թե հասարակությունը եւս պետք է հանդուրժող լինի՝ տարբեր հարցերի հետ կապված, ու դրական գնահատեց այն, որ հասարակությունը կարողանում է ազատորեն դուրս գալ փողոց ու իր կարծիքն արտահայտել:
-Պարո՛ն Սահակյան, արդեն մի քանի օր շարունակ ոստիկանների կողմից բռնություններ են կիրառվում Կոմիտասի 5 հասցեում ու Երեւանի քաղաքապետարանի մոտ բողոքի ակցիա անող մարդկանց նկատմամբ: Ոստիկանները 26 մարդու բերման են ենթարկել Կոմիտասի 5-ից, եւս 16-ին` քաղաքապետարանի մոտից: Ձեզ՝ որպես իշխանության ներկայացուցչի, դո՞ւր է գալիս ստեղծված իրավիճակը:
-Երկրում ինչ տեղի է ունենում, պատասխանատվությունը, բնականաբար, ընկնում է իշխանությունների վրա: Իսկ իշխանությունները ստեղծվում են, որպեսզի կանոնակարգեն որոշակի գործողություններ, որը պետության շահերից բխող գործողություններ են: Ինչ վերաբերում է նման իրողությանը, ապա ես, իհարկե, դրական եմ գնահատում այն առումով, որ դաշտ է ստեղծվելու, հասարակությունը կարողանում է ազատորեն իր բողոքն արտահայտել: Խնդիրը նոր մշակույթի ձեւավորման փուլում է, ու ոստիկանները գործում են այնպես, ինչպես օրենքի պահանջն է:
-Բայց օրենքի պահանջն այն չէ, որ ոստիկանները «հարձակվեն» ու ծեծի ենթարկեն բողոքի ակցիայի մասնակիցներին, այն մարդկանց, որոնք ժողովրդի կողքին են ու ցանկանում են նրանց օգնել: Ճի՞շտ եք համարում, որ ոստիկանը ծեծի ենթարկի նրանց, ովքեր բողոքի ձայն բարձրացնեն:
-Ուրեմն մեր հասարակությանն էլ պետք է զգուշացնել, թե որն է օրենքը, ու իրենք ինչպես պետք է վարվեն ոստիկանի հետ, ինչպիսի պատասխան տան: Եթե ժողովուրդը մտածում է, որ իր ճշմարտությունով բացարձակ է, դա չի նշանակում, որ կարող են արհամարհել ոստիկաններին, չենթարկվել: Պետք է հանդուրժող լինել միմյանց նկատմամբ: Իհարկե, դա էլ այլ խնդիր է, բայց դե, համենայնդեպս, բողոքի ազատությունը կա, ու ես դա բարձր եմ գնահատում:
-Տեղեկություններ կան, որ ոստիկաններին հրահանգել են, որպեսզի իրենք ամեն կերպ թույլ չտան՝ Կոմիտասի 5 հասցեում շինարարության ընթացքը «խաթարվի» մեկ պարզ պատճառով, որ այդ շենքի սեփականատերը Բարսեղ Բեգլարյանն է (Ֆլեշ Բարսեղը): Ինչպե՞ս կմեկնաբանեք այս ամենը:
-Ես չգիտեմ: Համենայնդեպս պարզ է, որ շինարարն օրինական փաստաթուղթ ունի, այսինքն՝ ոչ թե ժողովուրդը պետք է կռվի շինարարի դեմ, այլ պետք է կարողանա խնդիրները հասցնել պատկան մարմիններին եւ որոշակիորեն դրան հասնում է: Ու ես դա դրական եմ գնահատում, բայց ավելի լուրջ, ոչ այդպես աղմուկ-աղաղակով, ամբիցիաներով: Սովորաբար, եթե իրավունքի խնդիր է, երբեւիցե քո իրավունքն իրագործելու համար պետք չէ, որ ուրիշի իրավունքին բռնանաս: Ի՞նչ է նշանակում փողոցում պառկել եւ այդքան քաղաքացիների իրավունքին բռնանալ: Դրա համար էլ ոստիկանները դուրս են եկել փողոց իրենց աշխատանքը կատարելու համար: Այսինքն՝ դեռեւս նման մշակույթի կարիք ունենք: Պարզապես եթե խնդիրներ կան, ապա կարելի է ինչ-որ լուծումներ գտնել, օրենքը փոխել, կարելի է ձեռնարկումներ անել, կարելի է վերլուծական դաշտ ստեղծել: Այդպես չէ, որ բողոքը լրիվ ճշմարտացիություն ունի, եւ այնպես չէ, որ այնպիսի հանգամանք կա, որ բոլորը պետք է մեկ հարցի շուրջ միատեսակ կարծիք ունենան: Կարծիքներին չի կարելի բռնանալ: Ես ինֆորմացիա չունեմ՝ ում է պատկանում այդ շենքը, քանի որ չեմ սիրում, երբ ուրիշի գրպանն են մտնում: Եթե դա Ձեր ասած մարդունը չլինի, մեկ ուրիշինը կլինի, մեկը պետք է անի դա: Մի տեսակ բան է ստացվել, որ մեր երկրում ոչինչ չպետք է արվի, պետք է ասֆալտապատում չլինի, պետք է մեծահարուստներ չլինեն, պետք է արտադրողներ չլինեն, որպեսզի ազգը, պետությունը սրբորեն առաջ մղվեն: Ժամանակի մեջ դրանք պետք է հղկվեն:
-Նախօրեին ՀՀԿ առաջնորդ Սերժ Սարգսյանը Ծաղկաձորի օլիմպիական գլխավոր մարզահամալիրի մարզադաշտում ներկա է գտնվել «Լավագույն մարզական ընտանիք-2013» ամենամյա մրցույթի եզրափակիչ փուլին: Այնտեղ ներկա է եղել նաեւ ԲՀԿ առաջնորդ Գագիկ Ծառուկյանը, եւ նրանք շատ ջերմ «շփումներ» են ունեցել միմյանց հետ: Ի վերջո, այժմ ՀՀԿ-ն ու ԲՀԿ-ն ի՞նչ հարաբերություններ ունեն:
-Այսինքն՝ Դուք մտածում եք, որ Հայաստան աշխարհում, եթե քաղաքական գործունեություն են ծավալում, պետք է միմյանց հետ թշնամանա՞ն: Կարծում եմ՝ Ծառուկյանի հետ ոչ միայն նախագահի, այլեւ մեր փոխհարաբերությունները պատշաճ վիճակում են գտնվում: Եթե մարդ այլ կերպ է մտածում, ուրեմն թշնամի՞ է, լրիվ պետք է հակառակ ճանապարհո՞վ գնանք: Մարդիկ պետք է անընդհատ այլ կարծիքներ ունենան, իսկ դրանց հիման վրա ճշմարտացի որոշումներ կայացնեն:
-Թշնամիներ չեն, բայց իրենք քննադատում են ՀՀԿ-ի ցանկացած գործունեություն…
-Սկզբունքների տարբերություն եթե կա, դա չի նշանակում, որ սեւ ու սպիտակ է ամբողջ պետությունը: Իհարկե, խնդիրներ կան, որ կարող են դեմ լինել, խնդիրներ կան, որ կարող ենք համագործակցել: Քաղաքականությունն այդպես պետք է լինի: Հիմա զարմանում են, որ կարելի է քննադատել ու համագործակցել, քննարկել, սա էլ ես դրական եմ գնահատում:
.gif)
