ԱՌՈՂՋԱՊԱՀՈՒԹՅԱՆ ՆԱԽԿԻՆ ՆԱԽԱՐԱՐԸ ԶԱՐՄԱՑԱԾ Է

«Ժողովուրդ»-ի հետ զրույցում ԱԺ առողջապահության, մայրության եւ մանկության հարցերի մշտական հանձնաժողովի ՀՀԿ-ական նախագահ Արա Բաբլոյանը, անդրադառնալով ՀՀ առողջապահության նախարարության պետական առողջապահության գործակալության պետ Սարո Ծատուրյանին առաջադրված մեղադրանքին, ասաց. «Ինձ համար մի քիչ զարմանալի է, որ կարող է նմանատիպ չարաշահումներ տեղի ունենալ»:

Հիշեցնենք, որ 2016 թվականի հունիսի 13-ին ՀՀ քննչական կոմիտեի ՀԿԳ քննության գլխավոր վարչության վարույթում քննվող քրեական գործով ձերբակալվել, իսկ ավելի ուշ ազատ էին արձակվել ՀՀ առողջապահության նախարարության պետական առողջապահության գործակալության պետ Սարո Ծատուրյանը, Երեւանի քաղաքային կենտրոնի պետ Արսեն Սեդրակյանը, գործակալության բժշկական ծառայությունների գնման եւ տեղեկատվական բաժնի նախկին պետ Սամվել Խարազյանը:
Ըստ պաշտոնական հաղորդագրության՝ վերջիններս ձերբակալվել էին ՀՀ առողջապահության նախարարության աշխատակիցների կողմից 2012-2014թթ. առողջարանային կեղծ ուղեգրեր պատրաստելու եւ իրացնելու դեպքի առթիվ հարուցված քրեական գործի շրջանակներում: Նրանց մեղադրանք էր առաջադրվել ՀՀ քրեական օրենսգրքի 308-րդ հոդվածի 2-րդ մասով՝ պաշտոնեական լիազորությունները չարաշահելը, որն անզգուշությամբ առաջացրել է ծանր հետեւանքներ:
«Ժողովուրդ»-ը այս կապակցությամբ զրուցել է ՀՀ առողջապահության նախկին նախարար ԱԺ առողջապահության, մայրության եւ մանկության հարցերի մշտական հանձնաժողովի նախագահ, ՀՀԿ խմբակցության պատգամավոր Արա Բաբլոյան հետ:
-Պարո՛ն Բաբլոյան, Դուք առողջապահության նախարար եք եղել, ըստ Ձեզ՝ Սարո Ծատուրյանը կարող էր առանց իր ղեկավարների իմացության առողջարանային կեղծ ուղեգրեր պատրաստել:
-Գիտեք, քանի որ պրոցեսը շարունակվում է, դժվար է դեռ բոլոր մանրամասնությունները լսել եւ բարձրաձայնել, դրա համար, կարծում եմ, ավելի լավ կլինի, որ մենք սպասենք, տեսնենք՝ համապատասխան քննչական մարմինների վերջնական եզրակացությունները ինչպիսին են, որպեսզի հասկանանք, թե ինչ է տեղի ունենում: Ամեն դեպքում ինձ համար էլ դեռ մինչեւ վերջ հասկանալի չէ, թե ինչպես կարող են նմանատիպ չարաշահումներ տեղի ունենալ:
-Այս հարցը եւս մեկ անգամ բոլորի ուշադրությունը սեւեռեց անվճար ուղեգրերի տրամադրման գործընթացի վրա, պարզվեց, որ 2014 թվականին են միայն որոշել ուղեգրերին հատուկ պաշտպանիչ շերտ ավելացնել, որպեսզի դրանք չկեղծեն: Պատկերացնում եք՝ մինչեւ 2014 թվականի այդ փոփոխությունը քանի նախարար ենք ունեցել, եւ ինչ չարաշահումների մասին կարող է խոսք լինել:
-Ի սկզբանե, երբ ստեղծվել են ուղեգրերը, իհարկե, դրանք եղել են ոչ պաշտպանված, որովհետեւ բոլոր պրոցեսները, մշակումները տեղի են ունեցել 1996-1997 թվականներին: Այո, այն ժամանակ ես նախարարն եմ եղել, բայց հետագայում ավելի զարգացել են մոտեցումները եւ պաշտպանողական մեխանիզմներ են մտցվել: Միանշանակ մշտական ծրագրերի զարգացման առումով վերահսկողությունը ավելի պետք է հստակեցվի, որպեսզի առարկայական լինի ուղղվածությունը, որ մենք իմանանք՝ իսկապես ներդրված գումարներն ուղղված են ճիշտ նպատակներին:
-Իսկ Ձեր՝ որպես նախարար պաշտոնավարման շրջանում այդ վտանգը չէիք տեսնո՞ւմ:
-Մեր ժամանակ այնքան նոր էր այդ ամենը, որ վտանգների հնարավորությունը շատ ավելի մեծ էր, քան թե հիմա:
-Կոնկրետ ի՞նչ վտանգների մասին է խոսքը:
-Երբ դու նոր համակարգ ես դնում, միշտ էլ այն ավելի թերի է լինում, քան թե մի համակարգ, որը 20 տարվա ընթացքում կարող է շտկվել: Մյուս կողմից իմանալով, որ նոր համակարգ ենք ներդնում, մենք այն խիստ հսկողության տակ էինք պահում:
-Դուք աշխատել եք Սարո Ծատուրյանի հետ, նա կարո՞ղ էր միայնակ գործել:
-Առիթ ունեցել եմ իր հետ աշխատելու: Ինձ համար մի քիչ զարմանալի է, որ կարող է նմանատիպ չարաշահումներ տեղի ունենալ, քանի որ ինքը ընդհանրապես բավականին կազմակերպված անձնավորություն է, նույնիսկ չեմ էլ կարող պատկերացնել, թե նա ինչպես կարող է նման բան թույլ տալ:
-Պարո՛ն Բաբլոյան, ինչո՞ւ են միշտ «մանր ձկները», ասել է, թե ցածր օղակներում գտնվող պաշտոնյաները պատասխանատվության առաջ կանգնում: Այս չարաշահման դեպքը բացահայտվել է 2012-2014 թվականներին, այդ ժամանակ նախարարը եղել է Դերենիկ Դումանյանը: Չեք կարծում, որ ժամանակն է, որ նախ եւ առաջ ոլորտի ղեկավարները պատասխանատվության ենթարկվեն, որպեսզի մյուս պաշտոնյաների համար դաս լինի:
-Չեմ կարծում, որ նմանատիպ խնդիրները նախարարի մակարդակով կառավարվող խնդիրներ պետք է լինեն:
-Եթե ոչ նախարարը, ապա ո՞վ է պատասխանատու իր ղեկավարած ոլորտի բարձիթողի վիճակի համար:
-Նախարարի պաշտոնը դա ավելի առողջապահության քաղաքականությամբ զբաղվելու պաշտոն է, այլ ոչ թե…
-Իսկ մի՞թե առողջապահության քաղաքականությանը չի վերաբերում այն հարցը, թե ով եւ ինչ չափանիշներով է առողջարանային ուղեգիր ստանում, արդյո՞ք նախարարը չպետք է վերահսկի հենց այս ոլորտում տարվող քաղաքականությունը:
-Մեզ մոտ այնպիսի տպավորություն է, որ նախարարը ամեն ինչին պատասխան պիտի տա: Այդպես չի:
-Իսկ ո՞վ պետք է այդ պատասխանը տա:
-Նա պատասխանատու է քաղաքականության եւ մշակումների ապահովման համար, բայց իրականացումը, դա արդեն ամեն մեկը պատասխանատու է իր մասով: Այսինքն՝ նախարարը ամենօրյա տնօրենի մակարդակի կառավարում չի կարող իրականացնել, դա քաղաքական պաշտոն է, եւ նա զբաղված է առողջապահության քաղաքականությամբ:

Զրուցեց ՔՆԱՐ ՄԱՆՈՒԿՅԱՆԸ

 
ԳՈՐԾ ԵՆ ԿԱՐՈՒՄ
2016թ. հունիսին 20-ին ՀՀ քննչական կոմիտեն կալանավորել էր Ժիրայի Սէֆիլյանին, քանի որ մայիսի 20-ին ունեցած ավտովթարի ժամանակ մեքենաներից մեկում հայտնաբերվել էր զենք-զինամթերք, ինչը վերագրվեց Սէֆիլյանին: Այս գործով 9 անձի առաջադրվել է մեղադրանք, որոնց թվում է Ժիրայր Սէֆիլյանը, նրանցից 7-ը կալանավորվել են, մեկի նկատմամբ հայտարարվել է հետախուզում:
«Ժողովուրդ»-ը զրուցեց Ազգային ժողովի Մարդու իրավունքների պաշտպանության եւ հանրային հարցերի մշտական հանձնաժողովի նախագահ Էլինար Վարդանյանի հետ:
-Նախկին հրամանատար, ներկայիս քաղաքական գործչին կալանավորել են այն բանի համար, որ ուրիշ մարդկանց մոտ զենքեր են հայտնաբերել ու ասում են, որ Ժիրայր Սէֆիլյանինն է: Ինչքանով է, ըստ Ձեզ, լուրջ այս մեղադրանքը:
-«Հիմնադիր խորհրդարանի» անդամ Ժիրայր Սէֆիլյանի կալանավորումը մեկ քաղաքացու ցուցմունքի հիման վրա իրականում կասկածների տեղիք է տալիս: Ուստի դա է պատճառը, որ ես ու շատ շատերն այս ամենում քաղաքական ենթատեքստ ենք տեսնում: Մենք Ժիրայր Սէֆիլյանի ձերբակալումից անմիջապես հետո հանդիպեցինք իր տիկնոջ հետ եւ փորձեցինք իր հետ զրույցի ընթացքում հասկանալ, թե ինչ է կատարվում: Անկեղծ ասած, եւս մեկ անգամ ամրապնդվեց մեր կասկածները, որ այստեղ կարելի է զուտ քաղաքական ենթատեքստ տեսնել, եւ ուստի դա է պատճառը, որ գործի քննությունը շարունակելու ենք պահել մեր ուշադրության կենտրոնում:
-Ստացվում է, որ ոչ մի երաշխիք չկա, որ վաղը մեկ այլ քաղաքացու չեն ձերբակալի, որն էլ ասի, թե Էլինար Վարդանյանը իրեն ի պահ զենք էր տվել: Ստացվում է, որ Ձեզ էլ պետք է կալանավորե՞ն:
-Տեսեք, մեզ մոտ մի հանգամանք կա, որի մասին խոսեց Կարեն Անդրեասյանը, իր խոսքերն եմ ցիտում: Եթե որեւէ մեկի բնակարանում տանկ են հայտնաբերում, կարող են ասել, թե դա, թերւես, միամիտ էր այնտեղ, եւ մեկի բնակարանում որեւէ բան չեն հայտնաբերում բավարար հիմք կարող է հանդիսանալ անձին ձերբակալելու համար: Ամեն տարի Մարդու իրավունքների պաշտպանի զեկույցի ընթացքում այդ հարցը բարձրացվել է, սակայն խնդիրը շարունակում է մնալ: Ինչ են անելու հարցերը, եթե իրավական տեսանկյունից նայեք, փաստաբանները պետք է զբաղվեն, քաղաքական տեսակետից հարցը պետք է բոլորը պահեն ուշադրության կենտրոնում: Անկախ ամեն ինչից, եթե չլինի քաղաքական կամք՝ փոխելու այս ամենը, ոչինչ չի փոխվելու: Այսինքն՝ մենք առաջին հերթին պետք է տեսնենք հասցեատերերին, ովքեր պետք է ունենան քաղաքական կամք փոխելու իրադրությունը, որպեսզի քաղաքական հայացքների համար քաղաքական ելույթների համար որեւէ մեկին չկարվի որեւէ հանցագործություն:

Ք. ՄԱՆՈՒԿՅԱՆ

ԴԵՄՔՈՎ ԳՈՒՑԵ ՃԱՆԱՉՈՒՄ Է
Ապօրինի կերպով զենք եւ ռազմամթերք, պայթուցիկ նյութեր ձեռք բերելու եւ փոխադրելու համար երկու ամսով կալանավորված «Նոր Հայաստան» ընդդիմադիր շարժման առաջնորդ Ժիրայր Սէֆիլյանի պաշտպան Արա Զաքարյանը չի բացառում, որ ազատամարտիկը դեմքով ճանաչում է այս գործով առերեսված երկու մեղադրյալներին։ Փաստաբանը «Ազատության» հետ զրույցում միաժամանակ շեշտել է՝ Սէֆիլյանն այդ երկու անձանց հետ անձամբ ծանոթ չէ։ Շարժման անդամ Վարուժան Ավետիսյանն էլ չի բացառել, որ այդ անձինք «Նոր Հայաստան» շարժման գրասենյակ այցելած լինեն որպես համակիրներ, բայց, ըստ Ավետիսյանի, նրանցից ոչ ոք «Հիմնադիր խորհրդարան»-ի անդամ չէ։

ԼՐԱՑՈՒՑԻՉ  ՀՆԱՐԱՎՈՐՈՒԹՅՈ՞ՒՆ
Հակաօդային պաշտպանության հայ-ռուսական միավորված համակարգը չի խաթարի Հայաստանի եւ Լեռնային Ղարաբաղի անվտանգության ապահովման միասնական համակարգը: Այս մասին երեկ խորհրդարանում հայտարարել է ՀՀ պաշտպանության փոխնախարար Արա Նազարյանը: «Տարանջատման խնդիր չկա: Պարտավորությունները, որոնք գոյություն ունեն ռազմական դոկտրինով, միանշանակ են: Պարզապես լրացուցիչ հնարավորություններ են գալիս՝ ՀՀ սահմանները առավել էֆեկտիվ պաշտպանելու համար», -վստահեցրել է Ա. Նազարյանը:

ԿՀԱՐԹՎԻ՞
ԱԺ-ի դիմաց երեկ մի խումբ քաղաքացիներ կրկին իրենց բողոքի ձայնն են բարձրացրել ընդդեմ համատեղ ՀՕՊ համաձայնագրի ընդունման: Ակցիայի մասնակիցներից Ներսես Գեւորգյանը, անդրադառնալով երեկվա միջադեպին, հայտնել է, որ քաղաքացին արդեն խոսել է Հրանտ Բագրատյանի հետ եւ հույս ունեն, որ միջադեպը կհարթվի: Հիշեցնենք, որ նախօրեին կայացած ցույցի ժամանակ պատգամավոր Հրանտ Բագրատյանի ու ակտիվիստներից մեկի միջեւ քաշքշուկ էր եղել: Ակտիվիստը վիրավորել էր Բագրատյանին եւ ջուր լցրել նրա վրա` մեղադրելով նրան անգործության մեջ: