ԼՈՒՐ ԿԱԴՐ

Լուսանկարն արվել է Վանաձորում

Վանաձորում երեկ արտակարգ դեպք է տեղի ունեցել: Վանաձոր քաղաքի Տարոն 4 թաղամասում այրվել է ավելի քան 60 մետր երկարություն ունեցող պահեստ: Հրդեհն ուղեկցվել է պայթյուններով: Դեպքի վայրում եղել են մեծ թվով հրշեջներ, ոստիկաններ, քաղաքացիներ: Նախնական տեղեկություններով` ներսում նաեւ ավտոմեքենաներ են եղել:

ՀԱՐՑ. Խնդրում եմ ասել` ի՞նչ կարող ենք անել, որպեսզի մեր բակի թափառող շների հարցը, ի վերջո, լուծում ստանա: Արդեն անհնար է դարձել մեր թաղամասում քայլել եւ զբոսնել: Այնքան մեծ ու շատ են թափառող շները, որ փողոցի բնակիչները պաշտպանվելու համար փայտերով են դուրս գալիս փողոց: Խնդրում եմ որեւէ կերպ խնդրին լուծում տալ:

ք. Երեւան, Սարի Թաղի 14 փողոցի մի խումբ բնակիչներ

ՊԱՏԱՍԽԱՆ. Սարի Թաղի 14 փողոցի բնակիչների հարցին ի պատասխան` տեղեկացնում ենք, որ ըստ Երեւանի քաղաքապետարանի աշխատակազմի առեւտրի եւ սպասարկումների վարչության` 2018 թվականի հուլիսի 3-ից ոլորտում մասնագիտացված ծառայություններ մատուցող «Յունիգրաֆ-իքս» ընկերությունը լուծարվել է` միաժամանակ ենթարկվելով վարչական տուգանքի Երեւանի քաղաքապետարանի կողմից:
Երեւանի քաղաքապետարանը առաջիկայում անցկացնելու է մասնագիտացված ծառայություններ իրականացնող նոր կազմակերպության մրցույթ, որի հաղթողն էլ կստանձնի տվյալ գործառույթները: Հստակ ժամկետների մասին Երեւանի քաղաքապետարանը պաշտոնական հարթակներում հանդես կգա լրացուցիչ տեղեկատվությամբ:

Երեւանի քաղաքապետարանի տեղեկատվության եւ հասարակայնության հետ կապերի վարչություն

«ԺՈՂՈՎՈՒՐԴ». Քաղաքապետարանը փայլուն պատասխան է ներկայացրել: «Յունիգրաֆ-իքս» ընկերությունը լուծարվել է, ապա տուգանվել, սակայն դրանից վերոնշյալ փողոցի բնակիչների խնդիրը չի լուծվել: Հուսանք` քաղաքապետարանը սուղ ժամանակում կփոխի իր աշխատելաոճը, այլապես ոչնչով չի տարբերվի նախկին համակարգի աշխատելաոճից:

ՀԱՐՑ. Եթե աշխատողը օրենքով սահմանված կարգով հանդիսանում է սոցիալական վճար կատարող, սակայն գտնվում է մինչեւ 3 տարեկան երեխայի խնամքի արձակուրդում, ապա սոցիալական վճար կատարելու պարտավորություն առաջանո՞ւմ է, թե՞ ոչ:

Տիգրանուհի Հայրապետյան (32 տարեկան, տնային տնտեսուհի)

ՊԱՏԱՍԽԱՆ. Տ. Հայրապետյանի հարցին ի պատասխան` տեղեկացնում ենք, որ համաձայն «Կուտակային կենսաթոշակների մասին» ՀՀ օրենքի 6-րդ hոդվածի 10-րդ մասի` գործատուն` որպես մինչեւ 3 տարեկան երեխայի խնամքի արձակուրդում գտնվող վարձու աշխատողի հարկային գործակալ, մինչեւ 3 տարեկան երեխայի խնամքի արձակուրդում գտնվող վարձու աշխատողի անունից իր միջոցների հաշվին հաշվարկում եւ փոխանցում է սոցիալական վճար խնամքի արձակուրդ գնալու օրվան հաջորդող ամսվանից մինչեւ երեխայի 2 տարին լրանալու ամիսը (ներառյալ) ընկած ժամանակահատվածի համար ամսական 3 000 դրամի չափով:

ՀՀ պետական եկամուտների կոմիտե

«ԺՈՂՈՎՈՒՐԴ». Գործատուի փոփոխման դեպքում նոր գործատուին պարտադիր կուտակային բաղադրիչի մասնակից լինելու մասին չհայտնելու դեպքում անձի` պարտադիր կուտակային բաղադրիչին մասնակից լինելու փաստը հայտնի դառնալուց հետո հետագա բազային եկամտից գործատուն ամբողջությամբ փոխանցում է անձի` նախորդ ժամանակահատվածում վճարման ենթակա, բայց չվճարված պարտադիր կուտակային վճարները: Կուտակային վճար կատարելու պարտականությունը պահպանվում է մինչեւ կենսաթոշակային տարիքը լրանալը: Եթե կենսաթոշակային տարիքը լրանալուց հետո մասնակիցը շարունակում է աշխատել, ապա նա ազատվում է պարտադիր կուտակային վճար կատարելու պարտականությունից, սակայն նա իր կամքով կարող է շարունակել մասնակցել պարտադիր կուտակային բաղադրիչին: