ԼՈՒՐ ԿԱԴՐ

Լուսանկարն արվել է Գեղարքունիքի մարզի Վաղաշեն համայնքում

Դեկտեմբերի 9-ին կայանալիք ընտությունների նախընտրական քարոզարշավի պաստառներն ամենուր են:

ՀԱՐՑ. Հայրս եւ մայրս ավանդներ են ունեցել իրենց անուններով: Խնդրում եմ ասեք` ես` որպես նրանց ժառանգ, կարող եմ ստանալ իրենց ավանդի գոնե մի մասը: Մայրս 1 ամիս շուտ մահացավ: Գյուղապետարանից տեղեկացնում են, որ գումարը եկել է, որ տրամադրեն, սակայն քանի որ մահացած է, չեն տրամադրում: Խնդրում եմ ասեք` ես կարո՞ղ եմ ստանալ իրենց ավանդը:

Վրեժ Հասրաթյան, Նոյեմբերյանի շրջան, Բարեկամավան գյուղ

ՊԱՏԱՍԽԱՆ. Համաձայն «ՀՀ 2006թ. պետական բյուջեի մասին» ՀՀ օրենքի եւ ՀՀ կառավարության 2006թ. մարտի 16-ի թիվ 352-Ն որոշմամբ հաստատված 1-ին կարգի կետի (այսուհետ` Կարգ)` ավանդների դիմաց փոխհատուցում ստանալու իրավունք են ունեցել 2005թ. հուլիսի 1-ից սկսած մինչեւ նպաստառու ընտանիքների ցուցակների ճշտման օրը` 2006թ. ապրիլի 1-ը ընկած անընդմեջ ընտանեկան նպաստ ստացող ընտանիքների կազմում ընդգրկված այն ավանդատուները, որոնք նախկին ԽՍՀՄ Խնայբանկի ՀԽՍՀ հանրապետական բանկում խորհրդային ռուբլով դրամական ավանդ են ներդրել մինչեւ 1993թ. հունիսի 10-ը ներառյալ: Նունուֆար Հասրաթյանի ընտանիքը 2005թ. հուլիսի 1-ից սկսած 2006թ. ապրիլի 1-ն անընդմեջ ստացել է ընտանեկան նպաստ:
Որպես դրամական ավանդների դիմաց ավանդների փոխհատուցում ստանալու իրավունք ունեցող անձ` 2006թ. մայիսին Նունուֆար Հասրաթյանը հաշվառվել է ավանդների փոխհատուցման ծրագրում, սակայն 2007թ. ապրիլի 17-ին մահացել է` չստանալով փոխհատուցման գումարը:
Կարգի 20-րդ կետի համաձայն` ավանդատուի փոխհատուցում ստանալու պահանջի իրավունքը համարվում է անձի հետ անխզելիորեն կապված իրավունք, այն չի կարող անցնել այլ անձի, լինել դրավի առարկա: Իսկ 22-րդ կետով սահմանված է, որ ավանդատուի` Հայաստանի Հանրապետության նկատմամբ փոխհատուցում ստանալու գույքային իրավունքը համարվում է դադարած կատարմամբ` վճարվմամբ, կամ ավանդատուի մահով:
Ելնելով վերոգրյալից` Ն. Հասրաթյանի կողմից ներդրված դրամական ավանդների դիմաց տրամադրվող փոխհատուցումը Վրեժ Հասրաթյանին վճարել հնարավոր չէ:

ՀՀ աշխատանքի եւ սոցիալական հարցերի նախարարության հասարակայնության հետ կապերի վարչություն

«ԺՈՂՈՎՈՒՐԴ». ԽՍՀՄ Խնայբանկի ՀԽՍՀ հանրապետական բանկում մինչեւ 1993թ.հունիսի 10-ը ներդրված դրամական ավանդների դիմաց փոխհատուցման տրամադրումը կրել(ում) է հասցեական բնույթ եւ նպատակաուղղվել է առաջին հերթին հանրապետության բնակչության սոցիալապես առավել անապահով խմբերին դասված քաղաքացիների սոցիալական վիճակի բարելավմանը:

ՀԱՐՑ. Խնդրում եմ ասեք` ի՞նչ պայմաններ են սահմանված` ուսման վճարի փոխհատուցման ծառայությունից օգտվելու համար:

Լիաննա Պողոսյան (32 տարեկան)

ՊԱՏԱՍԽԱՆ. Հայտնում ենք, որ սոցիալական փաթեթում ընդգրկված են Հայաստանի Հանրապետության եւ Լեռնային Ղարաբաղի Հանրապետության ինչպես պետական, այնպես էլ հավատարմագրված ոչ պետական ուսումնական հաստատություններ, որոնք իրականացնում են բարձրագույն եւ հետբուհական հիմնական կրթական ծրագրեր, նախնական մասնագիտական (արհեստագործական) եւ միջին մասնագիտական հիմնական կրթական ծրագրեր, հանրակրթական հիմնական ծրագրեր (բացառությամբ` մասնագիտացված եւ հատուկ ծրագրերի): Փաթեթում ներառված ուսումնական հաստությունների ցանկերը հրապարակված են ՀՀ կրթության եւ գիտության նախարարության պաշտոնական կայքէջում:

Կենսաթոշակային համակարգի իրազեկման կենտրոն

«ԺՈՂՈՎՈՒՐԴ». Սոցիալական փաթեթի ուսման վճարի ծառայության համար փոխանցում կարելի է իրականացնել միայն վերոհիշյալ կրթական ծրագրերի դեպքում: