«Ժառանգություն» կուսակցության ղեկավար Րաֆֆի Հովհաննիսյանը իր վերջին ասուլիսում հայտարարել էր, որ ինքը համաձայն չէ Լևոն Տեր-Պետրոսյանի այն հայտարարությանը, թե Մաքսային միությանն անդամակցությունն անշրջելի է:
Armlur.am լրատվականը Րաֆֆի Հովհաննիսյանին հիշեցրեց շաբաթներ առաջ «Միջազգային եվրասիական շարժման» լիդեր, իր ազգայնական հայացքներով հայտնի ռուս քաղաքագետ, հայ-ռուսական «Գրիբոյեդով» ակումբի անդամ Ալեքսանդր Դուգինի այն հայտարարությունը, որ եթե հանկարծ Հայաստանում իշխանության գան պրոարևմտյան ուժեր, Հայաստանը կարող է մոռանալ Արցախի գոյության մասին: Վերջինս չի կարծում, որ հանուն Արցախի արդարացված է Մաքսային միության անդամակցությունը:
«Ոչ: Ռազմավարական գործընկերոջ ներկայացուցչի այս տեսակետը ցույց է տալիս, թե իրենք ինչ կոպիտ ձևով են դիտարկում ռազմավարական գործընկերությունը»,- ասաց պրն Հովհաննիսյանը:
Այն իշխանությունը, որը, ըստ նախագահի նախկին թեկնածուի, վայելում է ժողովրդի քվեն, վստահությունը, ինքը պետք է որոշի ` որտեղ է Հայաստանը լինելու:
«ՄՄ-ն սահմանափակում է մեր ինքնիշխանությունը, դարձնում է Հայաստանը տարածք, մտնցում է մեզ փակուղի: Եթե մենք առաջարկենք որևէ ծրագիր մեր հարևաններին, ապա կարծում եմ ՌԴ-ն գործ ունենալով օրինավոր իշխանության հետ, պիտի փոխի իր մոտեցումը: Թող ոչ մեկը Հայաստանին և հայ ժողովրդին սպառնա Արցախի կորստով: Եթե սպառնալիքի լեզվով է խոսում, Հայաստանի ամենալավ պատասխանը գլուխ կախելը չպետք է լինի, այլ մեր ինքնիշխան այլընտրանքը»,- վստահ է նախագահի նախկին թեկնածուն:
-Պրն Հովհաննիսյան, հաշվի առնելով Դուգինի հայտարարությունը, չե՞ք կարծում, որ 2013-ի սեպտեմբերի 3-ին Պուտին – Սարգսյան հանդիպման ժամանակ Սերժ Սարգսյանին Ռուսաստանը շանտաժի է ենթարկել Արցախի խնդրով, որից հետո էլ նախագահը ստիպված է եղել Մաքսային միությանը միանալու հայտարարություն անելու:
-Եթե ինքը լիներ օրինավոր նախագահ, անգամ այդ հզոր երկրի նախագահին կասեր` ոչ շնորհակալություն:
Սոնա Դավթյան
.gif)
