Ուկրաինայի ԶՈւ գլխավոր հրամանատարը կարող է հեռանալ պաշտոնից

Ուկրաինայի ԶՈւ գլխավոր հրամանատար Ալեքսանդր Սիրսկին, ըստ տարածված տեղեկությունների, կարող է կորցնել պաշտոնը՝ նախագահ Վլադիմիր Զելենսկու կողմից բանակի ղեկավարության հնարավոր վերադասավորման ֆոնին։

Վերջին օրերին Կիևում հազարավոր մարդիկ բողոքի ցույցեր են անցկացրել՝ պահանջելով Սիրսկու հեռացումը և նախկին պաշտպանության նախարար Միխայիլ Ֆեդորովի վերադարձը։ Ֆեդորովը պաշտոնից հեռացվել էր Սիրսկու և գլխավոր շտաբի հետ տարաձայնություններից հետո։

Սիրսկին հերքել է հակամարտության մասին տեղեկությունները՝ նշելով, որ իրենց հարաբերությունները եղել են աշխատանքային։ Նա ներողություն է խնդրել, եթե վիրավորել է Ֆեդորովին, և հայտարարել, որ պետք է կենտրոնանալ ոչ թե անձնական տարաձայնությունների, այլ պատերազմի հաղթանակի վրա։

Ուկրաինայի գլխավոր շտաբը հերքել է Սիրսկու պաշտոնանկության մասին լուրերը՝ հայտարարելով, որ նա և նրա տեղակալ Անդրեյ Հնատովը շարունակում են կատարել իրենց պարտականությունները։

Միաժամանակ Զելենսկու աշխատակազմի ղեկավար Կիրիլո Բուդանովը հայտարարել է, որ իշխանությունը լսել է հանրության դիրքորոշումը, իսկ իրավիճակը լուծվում է «պրոֆեսիոնալ և կառուցողական եղանակով»։

Զինված ուժերի աղբյուրներից մեկը հայտնել է, որ Սիրսկու հեռանալու հարցը գրեթե որոշված է, սակայն դեռ քննարկվում է նրա հնարավոր փոխարինողի թեկնածությունը։