Armenian text to speach

Թրամփը Պուտինին ընկեր է անվանել, իսկ Սի Ծինփինը անձամբ է դիմավորել ԱՄՆ նախագահին․ պատմական հանդիպման ուշագրավ դրվագները

ՀԵՏԵՎԵՔ ՄԵԶ Telegram-ՈՒՄ
ԱՄՆ նախագահ Դոնալդ Թրամփի այցը Չինաստան ուղեկցվում է դիվանագիտական աննախադեպ ժեստերով։ Չինաստանի նախագահ Սի Ծինփինը նոյեմբերի 18-ին անձամբ է դիմավորել Թրամփին Շենժեն քաղաքի օդանավակայանում՝ խախտելով տասնամյակներ շարունակ պահպանված արարողակարգը։ Այսօր՝ նոյեմբերի 19-ին, Չինաստանի Ասիա-խաղաղօվկիանոսյան տնտեսական համագործակցության (APEC) գագաթնաժողովի շրջանակում նախատեսված են ԱՄՆ-ի, Ռուսաստանի և Չինաստանի առաջնորդների առաջին եռակողմ բանակցությունները։

Սի Ծինփինի անձնական դիմավորումը հատկապես ուշագրավ է նրանով, որ Չինաստանի առաջնորդը տասնամյակներ շարունակ անձամբ չի դիմավորել երկիր ժամանող օտարերկրյա պետությունների ղեկավարներին։ Ըստ միջազգային լրատվամիջոցների՝ նման վերջին դեպքը եղել է 1959 թվականին, երբ Չինաստանի այն ժամանակվա առաջնորդ Մաո Ցզեդունը օդանավակայանում դիմավորել էր Խորհրդային Միության ղեկավար Նիկիտա Խրուշչովին։

Թրամփի դիմավորման արարողությունը կազմակերպվել է առանձնահատուկ շուքով։ Սի Ծինփինը մոտեցել է ամերիկյան նախագահի ինքնաթիռին, անձամբ սեղմել նրա ձեռքը և գրկախառնվել։ Օդանավակայանում եղել են զինվորական պատվո պահակախումբը, ծաղիկներ մատուցող երեխան, երկու երկրների դրոշները, հնչել են ազգային օրհներգերը, իսկ երկնքում թռիչք են իրականացրել ռազմական ինքնաթիռները։

Չինաստանի նախագահի այս քայլը դիտարկվում է որպես փոխադարձ ժեստ։ Սի Ծինփինը հիշեցրել է, որ անցած սեպտեմբերին ԱՄՆ կատարած այցի ժամանակ Թրամփն ու նրա կինը անձամբ էին մեկնել օդանավակայան՝ իրեն դիմավորելու և պաշտոնական ընդունելություն կազմակերպելու համար։ Չինաստանի նախագահը նշել է, որ իր երկիրը կարևորում է փոխադարձ հարգանքն ու քաղաքավարությունը։ Թրամփն էլ շնորհակալություն է հայտնել անձամբ դիմավորելու և հատուկ ընդունելության համար։

Մինչ այդ, Թրամփը հանդիպել է նաև Ռուսաստանի նախագահ Վլադիմիր Պուտինի հետ։ Նրանց հանդիպման ընթացքում ԱՄՆ նախագահը Պուտինին ընկեր է անվանել։

«Ո՞վ է նա։ Նա իմ ընկերն է»,- ասել է Թրամփը՝ մոտենալով Ռուսաստանի նախագահին։

Նա նաև նշել է, որ իրենք երկար տարիներ լավ հարաբերություններ են ունեցել և հույս հայտնել, որ հանդիպումից դրական արդյունքներ կստացվեն։ Երկու առաջնորդների առանձին հանդիպումը տևել է շուրջ 40 րոպե։

Թրամփը դրական է արտահայտվել նաև Սի Ծինփինի հետ անձնական հարաբերությունների մասին։ Չինաստանի նախագահի հետ շուրջ մեկ ժամ տևած հանդիպման ընթացքում նա հայտարարել է, որ իրենց «գերազանց անձնական հարաբերությունները» լավ են ծառայում երկու երկրների ժողովուրդներին։ Սի Ծինփինն իր հերթին նշել է, որ ԱՄՆ-ի և Չինաստանի հարաբերություններն ընդհանուր առմամբ կայունացել և բարելավվել են Թրամփի նախագահության ընթացքում։

Ինչո՞ւ է եռակողմ հանդիպումը պատմական

Նոյեմբերի 19-ին նախատեսված Թրամփի, Սի Ծինփինի և Պուտինի եռակողմ բանակցությունները պատմական են համարվում, քանի որ երեք երկրների առաջնորդները առաջին անգամ են նման ձևաչափով պաշտոնական հանդիպում անցկացնում։ Խոսքը աշխարհի երեք խոշոր ռազմական տերությունների ղեկավարների հանդիպման մասին է։

Associated Press-ի փոխանցմամբ՝ բանակցությունների առանցքային թեմաներից են լինելու միջուկային զինանոցների վերահսկողությունն ու կրճատումը, Ուկրաինայի և Իրանի պատերազմների դադարեցման հնարավորությունները։ Քննարկումների շրջանակում կարող են անդրադառնալ նաև առևտրային հարաբերություններին և արհեստական բանականության ոլորտում մրցակցությանը։

Հատկանշական է, որ բանակցություններին ընդառաջ Թրամփը հայտարարել է միջուկային սպառազինությունների կրճատման շուրջ համաձայնության հասնելու իր մտադրության մասին։ Սակայն փորձագետները զգուշավոր են գնահատում մեկ հանդիպման արդյունքում էական առաջընթացի հասնելու հնարավորությունը։

Միաժամանակ Ուկրաինան և եվրոպական մի շարք երկրներ մտահոգված են, որ երեք գերտերությունների ղեկավարները կարող են քննարկել միջազգային անվտանգությանն առնչվող հարցեր՝ առանց Կիևի և եվրոպական գործընկերների մասնակցության։

Այսպիսով, Շենժենում ընթացող հանդիպումները ոչ միայն երեք առաջնորդների անձնական հարաբերությունների ցուցադրություն են, այլև միջազգային անվտանգության, միջուկային սպառազինությունների և ընթացող պատերազմների շուրջ հնարավոր պայմանավորվածությունների կարևոր հարթակ։

Անի Վարդանյան



Մամուլի Տեսություն

Լրահոս