Մայիսի 31-ին ՀՀ ԱԳ նախարար Էդվարդ Նալբանդյանը, արտգործնախարարության կենտրոնական ապարատի ղեկավար կազմն ու Հայաստանի դիվանագիտական ներկայացուցչությունների ղեկավարները ժամանել են Ստեփանակերտ և հանդիպել Լեռնային Ղարաբաղի Հանրապետության նախագահ Բակո Սահակյանի հետ:
Armlur.am-ը ԼՂՀ նախագահի մամուլի խոսնակ Դավիթ Բաբայանից փորձեց պարզել` արդյոք Էդվարդ Նալբանդյանի ու Բակո Սահակյանի հանդիպումը պայմանավորված է եղել մայիսի 29-ին Աստանայում Եվրասիական միության հիմնադիր անդամ Ղազախստանի նախագահ Նուրսուլթան Նազարբաևի հայտարարությամբ, այն է` Հայաստանը պետք է միանա Եվրասիական միությանը ՄԱԿ-ի կողմից ճանաչված սահմաններով, այսինքն` առանց Լեռնային Ղարաբաղի:
ԼՂՀ նախագահի մամուլի խոսնակի պարզաբանմամբ` Էդվարդ Նալբանդյանի ու Բակո Սահակյանի այցն ամենևին պայմանավորված չէ Ղազախստանի նախագահի հայտարարությամբ:
«Սա հատուկ հանդիպում չի եղել, Հայաստանի արտգործնախարարության կենտրոնական ապարատի ղեկավար կազմն ու Հայաստանի դիվանագիտական ներկայացուցչությունների ղեկավարները տարին մեկ անգամ այցելում են Արցախ: Իսկ այն, որ հանդիպումը տեղի է ունեցել Աստանայում կայացած հանդիպումից հետո` մայիսի 31-ին, ընդամենը զուգադիպություն է»,- մանրամասնեց Դավիթ Բաբայանը:
Հանդիպման ընթացքում, ինչպես տեղեկացրեց Դավիթ Բաբայանը, քննարկվել են Լեռնային Ղարաբաղի հակամարտությանը, Հայաստան-Արցախ արտգործնախարարությունների համագործակցությանն ու Արցախի ներքին կյանքին առնչվող հարցեր:
ԼՂՀ նախագահի մամուլի խոսնակից փորձեցինք նաև պարզել` արդյոք ԼՂ հարցը դիվանագիտական շրջանակներում սրվել է: Եթե այդպես է, ի՞նչ քայլեր պետք է ձեռնարկի Հայաստանը: Դավիթ Բաբայանի պարզաբանմամբ` Ադրբեջանը շարունակում է իր ապակառուցողական քաղաքականությունը, կոպտորեն խախտում զինադադարը, բայց ասել, որ ԼՂ հակամարտության խնդրում արտառոց ինչ-որ գործընթացներ են տեղի ունենում, ճիշտ չէ:
«Բանակցային գործընթացի հիմնական նպատակը խաղաղ ճանապարհով արցախյան հակամարտության լուծումն է: Բայց խոսել ԼՂ հակամարտության վերջնական կարգավորման մասին, վաղաժամ է»,- մանրամասնեց ԼՂՀ նախագահը:
Արցախի Նախագահ Բակո Սահակյանն առանձնազրույց է ունեցել արտգործնախարար Էդվարդ Նալբանդյանի հետ։
Armlur.am-ի հարցին` ինչ հարցեր են քննարկվել առանձնազրույցի ժամանակ, Դավիթ Բաբայանը պատասխանեց. «Արտառոց որևէ բան չի քննարկվել, բոլոր հարցերը քննարկվել են արտգործնախարարության կենտրոնական ապարատի ղեկավար կազմի ու Հայաստանի դիվանագիտական ներկայացուցչությունների ղեկավարների ներկայությամբ»:
Սոնա Դավթյան
.gif)
