Հայաստանի ազգային պոլիտեխնիկական համալսարանում
այսօր տեղի են ունենում ռեկտորի ընտրություններ: Մինչ այդ, սակայն, կառավարման խորհրդի նիստը թեժ է ընթանում:
Խնդիրն այն է, որ կառավարման խորհրդի անդամ, Կրթության և գիտության նախարար Արմեն Աշոտյանը նստել է նախագահությունում` կառավարման խորհրդի նախագահ, ՀՀԿ պատգամավոր Սամվել Նիկոյանի կողքին: Այս հանգամանքը դուր չեկավ խորհրդի անդամներից մի քանիսին, ովքեր նախարարին կոչ են անում տեղ զբաղեցնել իրենց շարքերում:
Ի պատասխան` Սամվել Նիկոյանը նշեց, որ Արմեն Աշոտյանը բոլոր համալսարանների նիստերում էլ նստում է նախագահությունում: «Եթե որևէ մեկին հրավիրում եմ, որ նստի այստեղ, ես դա քննարկման թեմա չեմ դարձնում», – նշեց նա:
Խորհրդի անդամներից մեկը նշեց, թե նախարարի` այդտեղ նստելն ավելորդ ճնշում է իրենց և նիստը նախագահողի վրա: «Նախարարի այստեղ նստելը միմիայն մեր վրա ճնշում գործադրելու համար է, ձեր վրա էլ են ճնշում գործադրում», – նշեց նա: Ի պատասխան Նիկոյանը նշեց. «Մենք էլ, դուք էլ ճնշվողը չեք»: Իսկ խորհրդի անդամը շարունակեց. «Ավելորդ լարվածություն մի ստեղծեք, ոչ մի իմիջի իջեցում չէ: Մենք համաձայն ենք, որ դուք նախարար եք»:
Հավելենք, որ հարցի իրավունքով հանդես եկավ դասախոսներից մեկը և նշեց, որ ուսանողներից երեքը, որոնք ընդգրկված են խորհրդում, ավարտել են մագիստրատուրան և այլևս չեն հանդիսանում բուհի ուսանող, ուստի չեն կարող քվեարկել. «Առաջարկում եմ քնարկման դնել նրանց խորհրդից հանելու հարցը»: Ուսանողական խորհրդից Գոռ Իսպիրյանն էլ իր նշեց, որ սա առաջին դեպքը չի, որ փորձում են այնպես անել, որ ուսանողների ձայնը տեղ չհասնի: Նա ասաց, որ ցանկացած տեսակի առիթ օգտագործել են իրենց ճնշելու համար:
.gif)
