Այսօր ArmLur.am-ի հետ զրույցում Բաբկեն Պիպոյանն անդրադարձավ ՀՀ վարչապետ Հովիկ Աբրահամյանի հայտարարությանը, որ 2017-2019 միջնաժամկետ ծրագրում ժամանակավորապես կասեցվելու է սոցիալական փաթեթի «հանգստի» բաղադրիչը:
Նա նշեց, որ եթե սա արվել է չարաշահումների դեմ, ապա վատագույն որոշումն էր. «Մենք պետք է պայքարենք չարաշահումների դեմ և ոչ թե դրական պրոցեսը վերացնենք, դա մոտավորապես նման է այն բանի, որ ֆերմերն ունենա ջերմոցային տնտեսություն և այնտեղ լինեն բուժելի հիվանդություններ, բայց հիվանդության դեմ պայքարելու փոխարեն ամբողջ տնտեսությունն այրի»:
Պիպոյանը նաև նշեց, որ պետք չէ մոռանալ, թե ինչ հիմնավորումներով էին ընդունվել այս սոցփաթեթները. «Կային այսպիսի հիմնավորումներ, որ պետական աշխատողները հնարավորություն կունենան հանգստանալու և կբարձրացվի նրանց աշխատունակությունը, կնպաստեր նաև հյուրանցային բիզնեսի բարձրացմանը ՀՀ-ում, ինչը իր հերթին կնպաստեր զբոսաշրջության զարգացմանը: Այսինքն այս ամենը մենք մեկ հարվածով հօդս ենք ցնդեցնում, փոխանակ պայքարենք չարաշահումների դեմ»:
Պիպոյանը լավատեսական տրամադրվածությամբ նշեց, որ չարաշահումների դեմ պայքարելն իսկապես հնարավոր է. «Այլ խնդիր է, եթե իրականում այդ պրոցեսն իրականացվում է ոչ թե չարաշահումների հիմքով, այլ բացառապես այլ` պետական բյուջեի խնայողության խնդրով, բայց սրա մասին չենք բարձրաձայնում, սա արդեն այլ հարթության մեջ ենք դիտարկում»:
Բայց նա նաև հավելեց, որ այս ամենը եզրակացության ժանրից է, իսկ հարցը գլխավոր մնում է այն, որ չարաշահումների ենթատեքստում կասեցվում է սոցիալական փաթեթի «հանգստի» բաղադրիչը:
Լիլիթ Շաբոյան
.gif)
