Երեկ Վարդանանց-Խանջյան փողոցների գետնանցումով անցնելիս նկատեցինք, որ կատարվում են կրպակների տեղադրման աշխատանքներ: Փորձեցինք պարզել` արդյոք քաղաքապետարանից կա նման թույլտվություն, քանի որ վերջին շրջանում քաղաքային իշխանություններն ակտիվորեն ապամոնտաժում էին փողոցներում տեղադրված կրպակները:
«Ժողովուրդ»-ի հետ զրույցում կրպակների շինարարությամբ զբաղվող աշխատակիցը, ով չցանկացավ նշել իր անունը, հավաստիացրեց, որ քաղաքապետարանից ստացել է նման թույլտվություն, եւ այստեղի կրպակները լինելու են միատեսակ: «Ես զարմանում եմ մի բանի վրա, թե ինչու է շատերին հետաքրքրում այս փաստը: Փոխանակ մարդիկ ուրախ լինեն, որ գետնանցումի պատերի վրայից մաքրվում են տարբեր բնույթի ստեղծագործությունները, որ այստեղից դադարել է «անուշահոտությամբ» բուրել, եւ որ այստեղ պահպանվելու են սանիտարական բոլոր նորմերը, մարդիկ ավելի շատ խոսում են նոր կրպակների տեղադրման մասին: Նման արձագանքը, կարծում եմ, այնքան էլ ճիշտ չԷ»,-ասաց աշխատակիցը` հավելելով, որ մարդիկ չեն ցանկանում ապրել քաղաքակիրթ երկրում. «Թե չէ քաղաքը վերածվել էր արաբական բազարի, ու սննդի հետ կարելի էր վաճառքում տեսնել տնտեսական ապրանքներ ու տարբեր տեսակի այլ պարագաներ»:
.gif)
