ՈՎ ԿՓՈԽԱՐԻՆԻ ՎԻԼԵՆ ԳԱԲՐԻԵԼՅԱՆԻՆ

«Ժողովուրդ» օրաթերթի տեղեկությունների համաձայն՝ ԱԺ արդեն նախկին պատգամավոր Վիլեն Գաբրիելյանին Ազգային ժողովում, ըստ «Քաղաքացիական պայմանագրի» 2021 թվականի արտահերթ ընտրությունների ընտրացուցակի, կփոխարինի Արշակ Օրդուխանյանը։ Նա «Քաղաքացիական պայմանագիր» կուսակցության ընտրական ցուցակի 100-րդն է։

Հարկ է նշել, որ 2021 թվականին նոյեմբերին արդեն հայտնի դարձավ, որ Արշակ Օրդուխանյանը նշանակվել է ՀՀ փոխվարչապետ Սուրեն Պապիկյանի հասարակական հիմունքներով խորհրդական:

168.am-ը գրել էր, որ «475 միլիոն դրամ. ահա այսքան է արժեցել Պաշտպանության նախարարության՝ հերթական մեկ անձ ոչ մրցակցային ընթացակարգով գնումը «Զինառ» ՓԲԸ-ից: Պետգնումների armeps համակարգում գնման առարկա է մատնանշվել «հատուկ նշանակության այլ ծառայություններ»-ը, իսկ պայմանագրի տեխնիկական բնութագրից տեղեկանում ենք, որ այդ ծառայությունները ներառում են ՀՀ ՊՆ շենքերի սանիտարական մաքրումը, կոմունալ սպասարկումը, ինժեներատեխնիկական ենթակառուցվածքների տեխնիկական սպասարկումը եւ տարածքի բարեկարգումը: Ծառայությունները պետք է իրականացվեն 2024 թվականի առաջինից չորրորդ եռամսյակների ընթացքում:

Պայմանագիրը ստորագրել է «Զինառ» ՓԲԸ-ի տնօրենի ժամանակավոր պաշտոնակատար Արշակ Օրդուխանյանը»:

Արշակ Օրդուխանյանի անունը շրջանառվեց եւ առավել հայտնի դարձավ արդեն 2018 թվականի թավշյա իրադարձություններից հետո: Տարածվեցին որոշ տեղեկություններ, այդ թվում՝ նաեւ ՔՊ-ի հետ առնչությունների մասին, որոնց բաց նամակով արձագանքեց  Արշակ Օրդուխանյանը: Մամուլում հրապարակված նամակում մասնավորապես նշված էր. «Ինչ վերաբերում է իմ՝ «Քաղաքացիական պայմանագիր» կուսակցությանն անդամակցելուն, ապա շատ եմ ուզում շեշտել, որ կուսակցությանն ու թավշյա հեղափոխությանը միացել եմ ապրիլի 15-16-ին, այսինքն՝ այն ժամանակ, երբ հեղափոխության հաղթանակին քչերն էին հավատում, եւ որեւէ շահ չեմ հետապնդել: Միացել եմ ու գործուն աջակցություն եմ ունեցել բոլոր առումներով՝ հավատալով այդ շարժումն առաջնորդող Նիկոլ Փաշինյանի հռչակած արժեքներին ու գաղափարներին»:

Հետագայում նրա անունը հայտնվեց ՔՊ նախընտրական ցուցակներում, իսկ 2021 թվականին նոյեմբերին արդեն հայտնի դարձավ, որ Արշակ Օրդուխանյանը նշանակվել է Հայաստանի Հանրապետության փոխվարչապետ Սուրեն Պապիկյանի հասարակական հիմունքներով խորհրդական:

Ի դեպ, Արշակ Օրդուխանյանը շարունակել է աջակցել եւ հավատալ հռչակված արժեքներին ու գաղափարներին, նա Երեւանի ավագանու ընտրություններից առաջ՝ դեռեւս 2023 թվականի հուլիսի 31-ին, 1.5 միլիոն դրամով մասնակցել է «Քաղաքացիական պայմանագիր» կուսակցության դրամահավաք-երեկոյին:

ՍՈՆԱ ԳՐԻԳՈՐՅԱՆ

ԲԱՔՎԻ ՆԻՍՏԻՑ

Երեկ Բաքվում ընթանում էր Արցախի նախկին պետնախարար Ռուբեն Վարդանյանի դեմ հարուցված շինծու գործերով հերթական դատական նիստը։ Նախորդ նիստը տեղի էր ունեցել մարտի 18-ին, որի ընթացում տասից ավելի «տուժողներ» էին ցուցմունք տվել։ Հիշեցնենք, որ Արցախի ղեկավարների ու այլ պաշտոնյաների՝ ընդհանուր 15 անձի նկատմամբ հարուցված շինծու գործերով դատական նիստը տեղի է ունենալու ապրիլի 3-ին։

ԵԿԱՄՈՒՏՆԵՐՆ ԱՃԵԼ ԵՆ

Հայաստանի պետական եկամուտների կոմիտեն 2025 թվականի առաջին եռամսյակի ընթացքում ապահովել է 566.5 մլրդ դրամ հարկային եկամուտներ եւ պետական տուրքեր, ինչը 2025 թվականի պետական բյուջեի եռամսյակային համամասնություններով առաջին եռամսյակի համար նախատեսված ցուցանիշից՝ 563.1 մլրդ դրամից, ավելի է 3.4 մլրդ դրամով կամ 0.6%-ով, իսկ վերանայված ցուցանիշից՝ 563.4 մլրդ դրամից, ավելի է 3.1 մլրդ դրամով կամ 0.5%-ով: Միաժամանակ, Կոմիտեն տեղեկացնում է, որ 2024 թվականի առաջին եռամսյակի ընթացքում պետական բյուջե է մուտքագրվել 500.6 մլրդ դրամ հարկային եկամուտներ եւ պետական տուրքեր: Այսպիսով, նախորդ տարվա նույն ժամանակաշրջանի համեմատ հարկային եկամուտներն աճել են 65.9 մլրդ դրամով կամ 13.2%-ով:

ՔԿ-Ի ՎԱՐՈՒՅԹՈՒՄ

Երեւանի կենտրոնում՝ ադրբեջանցի բլոգերի հայտնվելու հանգամանքներն իրավապահները պարզում են։ Հիշեցնենք, որ ArmLur.am-ը ԱԱԾ տնօրեն Արմեն Աբազյանից փորձեց ճշտել, թե վարույթ կա նախաձեռնված, թե ոչ։ Վերջինս հորդորեց ճշտել Քննչական կոմիտեից։ ArmLur.am-ին հաստատեցին, որ ՔԿ-ում քրեական վարույթ է նախաձեռնվել։

ՄՏԱԴԻՐ ՉԷ

Ռուսաստանի Դաշնության արտաքին գործերի նախարարի տեղակալ Սերգեյ Րյաբկովի կարծիքով՝ Միացյալ Նահանգները մտադիր չէ դուրս գալ ՆԱՏՕ-ից, իսկ Վաշինգտոնի կոշտ հռետորաբանությունն օգտագործվում է կառույցի անդամ գործընկերներին խրախուսելու համար։ Այս մասին ՌԴ ԱԳ փոխնախարարը հայտարարել է «Միջազգային կյանք» ամսագրին տված հարցազրույցում։

«Չեմ կարծում, որ դա տեղի կունենա: Կարծում եմ, որ որոշակի քաջություն կա ԱՄՆ-ի ներկա վարչակազմի հռետորաբանության մեջ եւ բառապաշարում: Կարծում եմ, որ դա մի տեսակ բանավոր մտրակի տարր է, որը կարող է օգտագործվել «ՆԱՏՕ-ական ձիուն» խթանելու համար», – ասել է ռուս դիվանագետը։